Sī licet et paterīs, nōmen facinusque tacēbō,
et tua Lēthaeīs ācta dabuntur aquīs,
nostraque vincētur lacrimīs sententia sērīs,
fac modo tē pateat paenituisse tuī;
fac modo tē damnēs cupiāsque ērādere vītae
tempora, sī possīs, Tīsiphonaea tuae.
sīn minus, et flagrant odiō tua pectora nostrī,
induet īnfēlīx arma coācta dolor.
sim licet extrēmum, sīcut sum, missus in orbem,
nostra suās istō porriget īra manūs.
omnia, sī nescīs, Caesar mihi jūra relīquit,
et sōla est patriā poena carēre meā.
et patriam, modo sit sospes, spērāmus ab illō:
saepe Jovis tēlō quercus adusta viret.
dēnique vindictae sī sit mihi nūlla facultās,
Pīerides vīrēs et sua tēla dabunt.
quod Scythicīs habitem longē summōtus in ōrīs,
siccaque sint oculīs proxima signa meīs,
nostra per inmēnsās ībunt praecōnia gentēs,
quodque querar nōtum quā patet orbis erit.
ībit ad occāsum quicquid dīcēmus ob ortū,
testis et Hesperiae vōcis Eōus erit.
trāns ego tellūrem, trāns altās audiar undās,
et gemitūs vōx est magna futūra meī;
nec tua tē sontem tantummodo saecula nōrint,
perpetuae crīmen posteritātis eris.
jam feror in pugnās et nōndum cornua sūmpsī,
nec mihi sūmendī causa sit ūlla velim.
Circus adhūc cessat; spargit jam torvus harēnam
taurus et īnfēstō jam pede pulsat humum.
hōc quoque, quam voluī, plūs est: cane, Mūsa, recessūs,
dum licet huic nōmen dissimulāre suum.