Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
P. Ovidius Naso · Tristia

Book 4, Poem 2

Text kindly provided by Hypotactic

Jam fera Caesaribus Germānia, tōtus ut orbis,
victa potest flexō succubuisse genū,
altaque vēlentur fortasse Palātia sertīs,
tūraque in igne sonent īnficiantque diem,
candidaque adductā collum percussa secūrī
victima purpureō sanguine pulset humum,
dōnaque amīcōrum templīs prōmissa deōrum
reddere victōrēs Caesar uterque parent;
et quī Caesareō juvenēs sub nōmine crēscunt,
perpetuō terrās ut domus illa regat,
cumque bonīs nuribus prō sospite Līvia nātō
mūnera det meritīs, saepe datūra, deīs;
et pariter mātrēs et quae sine crīmine castōs
perpetuā servant virginitāte focōs;
plēbs pia cumque piā laetētur plēbe senātus,
parvaque cujus eram pars ego nūper, eques.
nōs procul expulsōs commūnia gaudia fallunt,
fāmaque tam longē nōn nisi parva venit.
ergō omnis populus poterit spectāre triumphōs,
cumque ducum titulīs oppida capta leget,
vinclaque captīvā rēgēs cervīce gerentēs
ante corōnātōs īre vidēbit equōs,
et cernet vultūs aliīs prō tempore versōs,
terribilēs aliīs inmemorēsque suī.
quōrum pars causās et rēs et nōmina quaeret,
pars referet, quamvīs nōverit illa parum:
'hic, quī Sīdoniō fulget sublīmis in ostrō,
dux fuerat bellī, proximus ille ducī.
hic, quī nunc in humō lūmen miserābile fīxit,
nōn istō vultū, cum tulit arma, fuit.
ille ferōx et adhūc oculīs hostīlibus ārdēns
hortātor pugnae cōnsiliumque fuit.
perfidus hic nostrōs inclūsit fraude locōrum,
squālida prōmissīs quī tegit ōra comīs.
illō, quī sequitur, dīcunt mactāta ministrō
saepe recūsantī corpora capta deō.
hic lacus, hī montēs, haec tot castella, tot amnēs
plēna ferae caedis, plēna cruōris erant.
Drūsus in hīs meruit quondam cognōmina terrīs,
quae bona prōgeniēs, digna parente, tulit.
cornibus hīc frāctīs viridī male tēctus ab ulvā
dēcolor ipse suō sanguine Rhēnus erat.
crīnibus ēn etiam fertur Germānia passīs,
et ducis invictī sub pede maesta sedet,
collaque Rōmānae praebēns animōsa secūrī
vincula fert illā, quā tulit arma, manū.'
hōs super in currū, Caesar, victōre vehēris
purpureus populī rīte per ōra tuī,
quāque ībis, manibus circumplaudēre tuōrum,
undique jactātō flōre tegente viās.
tempora Phoebēā laurō cingētur 'iō' que
mīles 'iō' magnā vōce 'triumphe' canet.
ipse sonō plausūque simul fremitūque calentēs
quadrijugōs cernēs saepe resistere equōs.
inde petēs arcem, dēlūbra faventia vōtīs,
et dabitur meritō laurea vōta Jovī.
haec ego summōtus, quā possum, mente vidēbō:
ēreptī nōbīs jūs habet illa locī;
illa per inmēnsās spatiātur lībera terrās,
in caelum celerī pervenit illa fugā;
illa meōs oculōs mediam dēdūcit in Urbem,
immūnēs tantī nec sinit esse bonī;
invenietque animus, quā currūs spectet eburnōs;
sīc certē in patriā per breve tempus erō.
vēra tamen capiet populus spectācula fēlīx,
laetaque erit praesēns cum duce turba suō.
at mihi fingendō tantum longēque remōtīs
auribus hic frūctus percipiendus erit,
āque procul Latiō dīversum missus in orbem
quī nārret cupidō, vix erit, ista mihi.
is quoque jam sērum referet veteremque triumphum:
quō tamen audierō tempore, laetus erō.
illa diēs veniet, mea quā lūgubria pōnam,
causaque prīvātā pūblica major erit.

Reader settings

Side Panel

Text SizeRelative to your text size
85%

Textual Aids

Touch Navigation