Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
P. Ovidius Naso · Tristia

Book 3, Poem 4

Text kindly provided by Hypotactic

Ō mihi cāre quidem semper, sed tempore dūrō
cognite, rēs postquam prōcubuēre meae:
ūsibus ēdoctō sī quicquam crēdis amīcō,
vīve tibi et longē nōmina magna fuge.
Vīve tibī, quantumque potes praelūstria vītā:
saevum praelūstrī fulmen ab arce venit.
Nam quamquam sōlī possunt prōdesse potentēs,
nōn prōsit potius, sīquis obēsse potest.
Effugit hībernās dēmissa antemna procellās,
lātaque plūs parvīs vēla timōris habent.
Aspicis, ut summā cortex levis innatet undā,
cum grave nexa simul rētia mergat onus.
Haec ego sī monitor monitus prius ipse fuissem,
in quā dēbēbam forsitan urbe forem.
Dum tēcum vīxī, dum mē levis aura ferēbat,
haec mea per placidās cumba cucurrit aquās.
Quī cadit in plānō (vix hoc tamen ēvenit ipsum)
sīc cadit, ut tāctā surgere possit humō.
At miser Elpēnor tēctō dēlāpsus ab altō
occurrit rēgī dēbilis umbra suō.
Quid fuit, ut tūtās agitāret Daedalus ālās,
Īcarus inmēnsās nōmine signet aquās?
Nempe quod hic altē, dēmissius ille volābat:
nam pennās ambō nōn habuēre suās.
Crēde mihī, bene quī latuit bene vīxit, et intrā
fortūnam dēbet quisque manēre suam.
Nōn foret Eumēdēs orbus, sī fīlius ejus
stultus Achillēōs nōn adamāsset equōs:
nec nātum in flammā vīdisset, in arbore nātās,
cēpisset genitor sī Phaethonta Merops.
Tū quoque formīdā nimium sublīmia semper,
prōpositīque, precor, contrahe vēla tuī.
Nam pede inoffēnsō spatium dēcurrere vītae
dignus es et fātō candidiōre fruī.
Quae prō tē ut voveam, mītī pietāte merēris
haesūrāque fidē tempus in omne mihi.
Vīdī ego tē tālī vultū mea fāta gementem,
quālem crēdibile est ōre fuisse meō.
Nostra tuās vīdī lacrimās super ōra cadentēs,
tempore quās ūnō fīdaque verba bibī.
Nunc quoque summōtum studiō dēfendis amīcum,
et mala vix ūllā parte levanda levās.
Vīve sine invidiā, mollēsque inglōrius annōs
exige, amīcitiās et tibi junge parēs,
Nāsōnisque tuī, quod adhūc nōn exulat ūnum,
nōmen amā: Scythicus cētera Pontus habet.

Reader settings

Side Panel

Text SizeRelative to your text size
85%

Textual Aids

Touch Navigation