Crīmine quō meruī, juvenis placidissime dīvum,
quōve errōre miser, dōnīs ut sōlus egērem,
Somne, tuīs? tacet omne pecus volucrēsque feraeque
et simulant fessōs curvāta cacūmina somnōs,
nec trucibus fluviīs īdem sonus; occidit horror
aequoris, et terrīs maria adclīnāta quiēscunt.
septima jam rediēns Phoebē mihi respicit aegrās
stāre genās; totidem Oetaeae Paphiaeque revīsunt
lampades et totiēns nostrōs Tīthōnia questūs
praeterit et gelidō spargit miserāta flagellō.
unde ego sufficiam? nōn sī mihi lūmina mīlle,
quae sacer alternā tantum statiōne tenēbat
Argus et haud umquam vigilābat corpore tōtō.
at nunc heu! sī aliquis longā sub nocte puellae
bracchia nexa tenēns ultrō tē, Somne, repellit,
inde venī; nec tē tōtās īnfundere pennās
lūminibus compello meīs (hoc turba precātur
laetior): extrēmō mē tange cacūmine virgae,
sufficit, aut leviter suspēnsō poplite trānsī.