Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Statius · Silvae

Book 1, Poem 5

Text kindly provided by Hypotactic

Nōn Helicōna gravī pulsat chelys enthea plēctrō,
nec lassāta vocō totiēns mihi nūmina, Mūsās;
et tē, Phoebe, chorīs et tē dīmittimus, Euhān;
tū quoque mūta ferae, volucer Tegeaee, sonōrae
terga premās: aliōs poscunt mea carmina coetūs.
Nāidas, undārum dominās, rēgemque coruscī
ignis adhūc fessum Siculāque incūde rubentem
ēlicuisse satis. paulum arma nocentia, Thēbae,
pōnite: dīlēctō volo lascīvīre sodālī.
junge, puer, cyathōs et nē numerāre labōrā
cūnctantemque incende chelyn; discēde Laborque
Cūraque, dum nitidīs canimus gemmantia saxīs
balnea dumque procāx vittīs hederīsque, solūtā
fronte verēcundō Clīō mea lūdit Etrūscō.
īte, deae viridēs, liquidōsque advertite vultūs
et vitreum tenerīs crīnem redimite corymbīs,
veste nihil tēctae, quālēs ēmergitis altīs
fontibus et vīsū Satyrōs torquētis amantēs.
nōn vōs quae culpā decus īnfāmāstis aquārum,
sollicitāre juvat; procul hinc et fonte dolōsō
Salmacis et viduae Cebrēnidos ārida lūctū
flūmina et Herculeī praedātrīx cēdat alumnī.
vōs mihi quae Latium septēnaque culmina, Nymphae,
incolitis Thybrimque novīs attollitis undīs,
quās praeceps Aniēn atque exceptūra natātūs
Virgo juvat Marsāsque nivēs et frīgora dūcēns
Marcia, praecelsīs quārum vaga mōlibus unda
crēscit et innumerō pendēns trānsmittitur arcū:
vestrum opus aggredimur, vestra est quam carmine mollī
pando domus. nōn umquam aliīs habitāstis in antrīs
dītius. ipsa manūs tenuit Cytherēa marītī
mōnstrāvitque artēs; neu vīlis flamma camīnōs
ūreret, ipsa facēs volucrum succendit amōrum.
nōn hūc admissae Thasos aut undōsa Carystos;
maeret onyx longē, queriturque exclūsus ophītēs:
sōla nitet flāvīs Nomadum dēcīsa metallīs
purpura, sōla cavō Phrygiae quam Synnados antrō
ipse cruentāvit maculīs lūcentibus Attis
quaeque Tyrī niveās secat et Sīdōnia rūpēs.
vix locus Eurōtae, viridis cum rēgula longō
Synnada distīnctū variat. nōn līmina cessant,
effulgent camerae, variō fastīgia vitrō
in speciēs animōque nitent. stupet ipse beātās
circumplexus opēs et parcius imperat ignis.
multus ubīque diēs, radiīs ubi culmina tōtīs
perforat atque aliō sōl improbus ūritur aestū.
nīl ibi plēbējum; nusquam Temesaea notābis
aera, sed argentō fēlīx prōpellitur unda
argentōque cadit, labrīsque nitentibus īnstat
dēliciās mīrāta suās et abīre recūsat.
Extrā autem niveō quī margine caerulus amnis
vīvit et in summum fundō patet omnis ab īmō
cui nōn īre lacū pigrōsque exsolvere amictūs
suādeat? hōc māllet nāscī Cytherēa profundō,
hīc tē perspicuum melius, Narcisse, vidērēs,
hīc vēlōx Hecatē velit et dēprēnsa lavārī.
Quid nunc strāta solō referam tabulāta crepantēs
audītūra pilās, ubi languidus ignis inerrat
aedibus et tenuem volvunt hypocausta vapōrem?
nec sī Bajānīs veniat novus hospes ab ōrīs,
tālia dēspiciet (fās sit compōnere magnīs
parva), Nerōnēā nec quī modo lōtus in undā,
hīc iterum sūdāre neget. mactē, ōro, nitentī
ingeniō cūrāque puer! tēcum ista senēscant,
et tua jam melius discat fortūna renāscī!

Reader settings

Side Panel

Text SizeRelative to your text size
85%

Textual Aids

Touch Navigation