Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Statius · Silvae

Book 1, Poem 3

Text kindly provided by Hypotactic

Cernere fācundī Tībur glaciāle Vopiscī
sī quis et īnsertō geminōs Aniēne penātēs,
aut potuit sociae commercia nōscere rīpae
certantēsque sibī dominum dēfendere vīllās,
illum nec calidō lātrāvit Sīrius astrō
nec gravis aspexit Nemeae frondentis alumnus:
tālis hiems tēctīs, frangunt sīc improba sōlem
frīgora, Pīsaeumque domus nōn aestuat annum.
Ipsa manū tenerā tēcum scrīpsisse Voluptās
tunc Venus Īdaliīs ūnxit fastīgia sūcīs
permulsitque comīs blandumque relīquit honōrem
sēdibus et volucrēs vetuit discēdere nātōs.
Ō longum memoranda diēs! quae mente reportō
gaudia, quam lassōs per tot mīrācula vīsūs!
ingenium quam mīte solō, quae fōrma beātīs
ante manūs artemque locīs! nōn largius usquam
indulsit nātūra sibī. nemora alta citātīs
incubuēre vadīs; fallāx respōnsat imāgō
frondibus, et longās eadem fugit umbra per undās.
ipse Aniēn (mīranda fidēs) īnfrāque superque
saxeus hīc tumidam rabiem spūmōsaque pōnit
murmura, ceu placidī veritus turbāre Vopiscī
Pīeriōsque diēs et habentēs carmina somnōs.
lītus utrumque domī, nec tē mītissimus amnis
dīvidit: alternās servant praetōria rīpās,
nōn externa sibī fluviōrum obstāre queruntur.
Sēstiacōs nunc Fāma sinūs pelagusque natātum
jactet et audācī victōs delphīnas ephēbō:
hīc aeterna quiēs, nūllīs hīc jūra procellīs,
numquam fervor aquīs. datur hīc trānsmittere vīsūs
et vōcēs et paene manūs. sīc Chalcida flūctūs
expellunt refluī, sīc dissociāta profundō
Bruttia Sīcanium circumspicit ōra Pelōrum.
Quid prīmum mediumve canam, quō fīne quiēscam?
aurātāsne trabēs an Maurōs undique postēs
an pictūrātā lūcentia marmora vēnā
mīrer, an ēmissās per cūncta cubīlia nymphās?
hūc oculīs, hūc mente trahor. venerābile dīcam
lūcōrum senium? tē, quae vada flūminis īnfrā
cernis, an ad silvās quae respicis, aula, tacentēs,
quā tibi tōta quiēs offēnsaque turbine nūllō
nox silet et nigrōs imitantia murmura somnōs?
an quae grāmineā suscepta crepīdine fūmant
balnea et impositum rīpīs algentibus ignem,
quāque vapōriferīs jūnctus fornācibus amnis
rīdet anhēlantēs vīcīnō flūmine nymphās?
Vīdī artēs veterumque manūs variīsque metalla
vīva modīs. labor est aurī memorāre figūrās
aut ebur aut dignās digitīs contingere gemmās;
quicquid et argentō prīmum vel in aere minōrī
lūsit, et ēnormēs manus est experta colossōs.
dum vagor aspectū vīsūsque per omnia dūcō,
calcābam necopīnus opēs. nam splendor ab altō
dēfluus et nitidum referentēs āera testae
mōnstrāvēre solum, variās ubi picta per artēs
gaudet humus superatque novīs asarōta figūrīs.
expāvēre gradūs. Quid nunc jungentia mīrer
aut quid partītīs distantia tēcta trichōrīs?
quid tē, quae mediīs servāta penātibus arbor
tēcta per et postēs liquidās ēmergis in aurās,
quō nōn sub dominō saevās passūra bipennēs?
et nunc ignārō forsan vel lūbrica Nāis
vel nōn abruptōs tibi dēmet Hamādryas annōs.
quid referam alternās geminō super aggere mēnsās
albentēsque lacūs altōsque in gurgite fontēs?
tēque, per oblīquum penitus quae lāberis amnem,
Marcia, et audācī trānscurris flūmina plumbō?
an sōlum Īoniīs sub flūctibus Ēlidis amnem
dulcis ad Aetnaeōs dēdūcat sēmita portūs?
illīc ipse antrīs Aniēn et fonte relictō,
nocte sub arcānā glaucōs exūtus amictūs
hūc illūc fragilī prōsternit pectora muscō,
aut ingēns in stāgna cadit vitreāsque natātū
plaudit aquās. illā recubat Tīburnus in umbrā,
illīc sulpureōs cupit Albula mergere crīnēs;
haec domus Ēgeriae nemorālem abjungere Phoebēn
et Dryadum viduāre chorīs algentia possit
Tāygeta et silvīs accersere Pāna Lycaeīs.
quod nī templa darent aliās Tīrynthia sortēs,
et Praenestīnae poterant migrāre sorōrēs.
Quid bifera Alcinoī laudem pōmāria vōsque,
quī numquam vacuī prōdistis in aethera, rāmī?
cēdant Tēlegonī, cēdant Laurentia Turnī
jūgera Lucrīnaeque domūs lītusque cruentī
Antiphatae; cēdant vitreae juga perfida Circēs
Dūlichiīs ululāta lupīs, arcēsque superbae
Ānxyris et sēdēs Phrygiō quās mītis alumnō
dēbet anus; cēdant, quae tē jam sōlibus artīs
āvia nimbōsā revocābunt lītora brūmā.
Scīlicet hīc illī meditantur pondera mōrēs;
hīc premitur fēcunda quiēs, virtūsque serēnā
fronte gravis sānusque nitor luxūque carentēs
dēliciae, quās ipse suīs dīgressus Athēnīs
māllet dēsertō senior Gargēttius hortō;
haec per et Aegaeās hiemēs Pliadumque nivōsum
sīdus et Ōleniīs dignum petiisse sub astrīs,
sī Maleae crēdenda ratis Siculōsque per aestūs
sit via: cūr oculīs sordet vīcīna voluptās?
hīc tua Tīburtēs Faunōs chelys et juvat ipsum
Alcīdēn dictumque lyrā majōre Catillum;
seu tibi Pindaricīs animus contendere plēctrīs,
sīve chelyn tollās hērōa ad rōbora, sīve
līventem satiram nigrā rūbīgine turbēs,
seu tua nōn aliā splendescat epistola cūrā.
Digne Midae Croesīque bonīs et Perside gāzā,
macte bonīs animī, cujus stāgnantia rūra
dēbuit et flāvīs Hermus trānscurrere rīpīs
et līmō splendente Tagus. sīc docta frequentēs
ōtia, sīc omnī dētēctus pectora nūbe
fīnem Nestoreae precor ēgrediāre senectae.

Reader settings

Side Panel

Text SizeRelative to your text size
85%

Textual Aids

Touch Navigation