Quō, quō scelestī ruitis? aut cūr dexterīs
aptantur ēnsēs conditī?
parumne campīs atque Neptūnō super
fūsum est Latīnī sanguinis,
nōn ut superbās invidae Karthāginis
Rōmānus arcēs ūreret,
intāctus aut Britannus ut dēscenderet
sacrā catēnātus viā,
sed ut Secundum vōta Parthōrum suā
Urbs haec perīret dexterā?
neque hic lupīs mōs nec fuit leōnibus
umquam nisi in dispār ferīs.
furorne caecōs an rapit vīs ācrior
an culpa? respōnsum date.
tacent et albus ōra pallor īnficit
mentēsque perculsae stupent.
sīc est: acerba fāta Rōmānōs agunt
scelusque frāternae necis,
ut inmerentis flūxit in terram Remī
sacer nepōtibus cruor.