Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Apicius · De Re Coquinaria

Book 7

Text kindly provided by Perseus

VII.

Vulvae steriles: lasere vulvas — sed accipies cirenaicum vel particum — aceto et liquamine temperato, appones. In vulva [et] sterile: piper, api semen, mentam siccam, lasaris radicem, mel, acetum et liquamen. Vulvae [et] steriles: pipere, liquamine, lasare partico, apponis. Vulvae steriles: pipere, liquamine et condito modico, apponis.

Callum, libelli, coticulae, ungellae: pipere, liquamine, lasare, apponis.

Vulvam ut tostam facias: in cantabro involve et postea in muriam mitte et sic coque.

Sumen elixas, de cannis surclas, sale aspargis et in furnum mittis vel in craticulam, subassas. teres piper, ligisticum, liquamen, mero et passo, amolo obligas et sumen perfundis.

Sumen plenum: teritur piper, careum, echinus salsus. consuitur et sic coquitur. manducatur cum allece, senapi.

In ficato oenogarum: piper, timum, ligisticum, liquamen, vinum modice, oleum.

Aliter: ficatum praecidis ad cannam, infundis in liquamine. piper, ligisticum, bacas lauri duas involves in augmento et in craticula assas et inferes.

Ofellas ostienses: in obillam designans ofellas incute ita ut cutis sic remaneat. teres piper, ligisticum, anetum, ciminum, silfium, bacam lauri unam, suffundis liquamen, fricas. in angularem refundis simul cum ofellis. ubi requieverint in condimentis biduo vel triduo, promis, surclas decusatim et in furnum mittis. cum coxeris ofellas quas destinaveras separabis. et teres piper, ligisticum, suffundis liquamen et passum modicum ut dulce fiat. cum fervuerit ius, amolo obligas. ofellas satias et inferes.

Ofellas apicianas: ofellas exossas, in rotundum conplicas, surclas, ad furnum admoves, postea praeduras. levas ut umorem expuant. in craticula igni lento exiccabis ita ne urantur. teres piper, ligisticum, ciperin, ciminum, liquamen et passo temperabis. cum hoc iure ofellas in caccabum mittis. cum coctae fuerint, levas et siccas, sine iure pipere asparso et inferes. si pingues fuerint cum surclas, tollis cutem. potest et de abdomine huiusmodi ofellas facere.

Ofellas aprogineo more: ex oleo, liquamine condiuntur et mittitur eis condimentum. cum coctae fuerint et super adicitur his cum in foco sunt conditura et denuo bulliunt: piper, condimentum, mel, liquamen, amolum cum iam bulliunt. et sine liquamine et oleo elixantur coquuntur et sic pipere perfunduntur. ius supra scriptum et sic bulliunt.

Aliter ofellae: recte finguntur ut pemma, surclantur. liquaminis summi ciatum, aquae ciatum, aceti ciatum et olei ciatum. simul mixtis et inmissis in patellam fictilem frigis et inferes.

Aliter ofellas: in sartagine abundanti oenogaro. piper aspargis et inferes. Aliter ofellas: ofellae prius sale et comino infusae in aequam recte friguntur.

Ofellas garatas: ponis ofellas in sartagine, adicies liquamen libra una, olei similiter, mellis aliquantum et sic frigis. Ofellas assas exbromabis, diligenter et in sartaginem mittis. friges oenogaro. postea simul cum ipso oenogaro inferes et piper aspargis. Aliter ofellas: in liquamine frigantur et calidae melle unguantur et sic inferantur. Ofellas lasaratas: lasar, gingiber, cardamomum et uno acetabulo liquaminis, misces cominum his omnibus tritis et ibi ofellas coques.

Assaturae. Assaturam assam a furno simplice. salis purimi conpensam cum melle. inferes.

Aliter assaturas: petrosilini scripulos VI. lasaris scripulos VI. gingiberis scripulos VI lauri bacas V. condimenti, lasaris radicis scripulos VI. origani scripulos VI. ciperis scripulos VI. costi modicum, piretri scripulos III. api seminis scripulos VI. piperis scripulos XII. liquaminis et olei quod sufficit.

Aliter assaturas: mirtae siccae bacam extemperatam cum cimino, pipere, melle, liquamine, defricto et oleo teres et ferve factum amolas. carnem elixam sale subassatam perfundis. piper aspargis et inferes.

Aliter assaturas: piperis scripulos VI. ligistici scripulos VI. petrosilini scripulos VI. api seminis scripulos VI. aneti scripulos VI. lasaris radicis scripulos VI. asareos scripulos VI. piretri modicum, ciperis scripulos VI. carei scripulos VI. cimini scripulos VI. gingiberis scripulos VI. liquaminis eminam, olei acetabulum.

Assatura sine colore elixatur et infunditur in fretali piper, condimentum, mel, liquamen et attoritur in clibano quousque coquatur. elixam vero colorare si voles, sine conditura assas et sucum callicum perfundis.

Ius in elixam omnem: piper, ligisticum, origanum, rutam, silfium, cepam siccam, caroenum, mel, acetum, olei modicum, persiccatam et savano expressam elixam perfundis.

Ius in elixam: piper, petrosilinum, liquamen, acetum, cariotam, cepullam, olei modicum. perfundis calido iure. Ius in elixam: teres piper, rutam aridam, feniculi semen, cepam, cariotam, liquamen et oleum.

Ius candidum in elixam: piper, liquamen, vinum, rutam, cepam, nucleos, conditum modicum, de bucellis maceratis unde stringat, oleum. cum coxerit ius, perfundis.

Aliter ius candidum in elixam: piper, careum, ligisticum, timum, origanum, cepullam, dactilum, mel, acetum, liquamen, oleum.

In copadiis ius album: piper, ciminum, ligisticum, rutae semen, damascena, infundis vinum, oenomeli et aceto temperabis. timo et origano.

Aliter ius candidum in copadiis: piper, timum, ciminum, api semen, feniculum, rutam, bacam mirtae, uvam passam. mulso temperas. agitabis ramo satureiae

Ius in copadiis: piper, ligisticum, careum, mentam, nardostatium, folium, ovi vitellum, mel, mulsam, acetum, liquamen et oleum. agitabis satureia et porro. amola ius.

Ius album in copadiis: piper, ligisticum, ciminum, api semen, timum, nucleos infusos, nuces infusas et purgatas, mel, acetum, liquamen et oleum.

Ius in copadiis: piper, api semen, careum, satureiam, cneci flores, cepullam, amigdala tosta, careotam, liquamen, oleum, senapis modicum. defricto coloras.

Ius in copadiis: piper, ligisticum, petrosilinum, cepullam, amigdala tosta, dactilum, mel, acetum, liquamen, defrictum, oleum.

Ius in copadiis: ova dura concidis, piper, ciminum, petrosilinum, parvum costum, mirti bacam, plusculum mel, acetum, liquamen, oleum.

Ius in elixam anetatum crudum: piper, aneti semen, mentam siccam, lasaris radicem, suffundis acetum, adicies cariotam, mel, liquamen, senapis modicum, oleum, defricto temperabis et hoc colorare pergito.

Ius in elixam allecatum: piper, ligisticum, careum, api semen, timum, cepullam, dactilum, allecem colatum, mel et vinum, temperas. apium viridem concisum super aspargis. oleum mittis et inferes.

Ventricula. Ventrem porcinum bene exinanies, aceto et sale, postea aqua lavas et sic hanc inpensam inples: pulpam porcinam tunsam tritam, ita et enervata conmisceas cerebella tria et ova cruda, cui nucleos infundis et piper integrum mittis et hoc iure temperas: teres piper, ligisticum, silfi, anesum, gingiber, rutae modicum, liquamen optimum et olei modicum. reples aqualicum sic ut laxamentum habeat, ne dissiliat in coctura. surclas ambas et in ollam bullientem summittis. levas et pungis acu ne crepet. cum ad dimidias coctum fuerit, lavas et ad fumum suspendis ut coloretur. et denuo eum perelixabis ut coqui possit deinde liquamine, mero, oleo modico.

Et cultello aperies et cum liquamine et ligistico apponis.

Ventrem ut tostum facias, in cantabro involve, postea in muriam mitte et sic coque.

Lumbuli [et renes] assi ita fiunt: aperiuntur in duas partes ita ut expansi sint et aspargitur eis piper tritum, nuclei et coriandrum concisum minutatim factum et semen feniculi tritum deinde lumbuli recluduntur passi et consuuntur et involvuntur omento et sic praedurantur in oleo et liquamine, inde assantur in clibano vel craticula.

Pernam, ubi eam cum caricis plurimis elixaveris et tribus lauri foliis, detracta cute tessellam incides et melle conplebis, deinde farinam oleo subactam contexes et ei corium reddes. et cum farina cocta fuerit, eximas furno, ut est et inferes.

Pernae cocturam: ex aqua cum caricis cocta simpliciter, ut solet, illata cum bucellis, caroeno vel condito, melius sucu ex musteis.

Petasonem ex musteis: petasonem elixas cum bilibri orei et caricis XXV. cum elixatus fuerit, decarnas et armillam illius, candenti vatillo uris et melle contingis. quod melius, missum, in furnum melle oblinas. cum coloraverit, mittis in caccabum passum, piper, fasciculum rutae, merum, temperas. cum fuerit temperatum, dimidium in petasonem perfundis et alia parte piperati bucellas musteorum pactas perfundis. cum sorbuerint, quod mustei recusaverint petasoni refundis.

Lardi coctura: tectum aqua cum multo aneto coques, oleum modicum destillabis et modicum salis.

Iocinera aedina vel agnina sic coques: aquam mulsam facies et ova, partem lactis admiscis eis ut incisa iocinera sorbeant. coques et oenogaro pipere asparso inferes.

Aliter [iocinera] in pulmonibus: ex lacte lavas pulmones — et colas quod capere possunt — et confringis ova dua cruda, salis grana pauca, mellis ligulam et similam conmiscis et inples pulmones, elixas et concidis.

Teres piper, suffundis liquamen, passum, merum. pulmones conpungis et hoc oenogaro perfundis.

Dulcia domestica: palmulas vel dactilos [et copto], semine, nuce vel nucleis, mel, piper tritum. confarcies, sale foris contingis. frigis. in melle cocto et inferes.

Aliter dulcia: musteos afros optimos rades (panges) et in lacte infundis. cum biberint, in furnum mittis. ne arescant, modico eximes. eos calidos melle perfundis, conpungis ut bibant. piper aspargis et inferes.

Aliter dulcia: siligineos rasos pangis et bucellas maiores facis, in lacte infundis, frigis et in oleo. mel superfundis et inferes.

Dulcia: piperato mittis mel, merum, passum, rutam, eo mittis nucleos, misces alicam elixatam, concisas nuces, avellanas tostas adicies et inferes.

Aliter dulcia: piper, nucleos, mel, rutam et passum teres, cum lacte et tractam, coges coagulum, coque cum modicis ovis perfusum, melle asparsum et inferes.

Aliter dulcia: accipies similam, coques et in aqua calida, ita ut durissimam pultem facias. deinde in tabellam expandis. cum refrixerit, concidis. quasi ad dulcia et frigis in oleo optimo. levas, perfundis mel. piper aspargis et inferes. melius feceris, si lac pro aqua miseris.

Tripatinam: accipies lac, adversus patinam aestimabis, temperabis lac cum melle quasi ad lactantia, ova quinque ad sextarium mittis, si ad eminam, ova tria. in lacte dissolvis ita ut unum corpus facias. in cumana collocas et igni lento coques. cum duxerit ad se, piper aspargis et inferes.

Ova sfongia ex lacte: ova quattuor, lactis eminam, olei unciam in se dissolvis ita ut unum corpus facias in patellam subtilem adicies olei modicum facies ut bulliat et adicies inpensam quam conparasti. una parte cum fuerit coctum, in disco verses, melle perfundis, piper aspargis et inferes.

Melca: lac acidum, piper et liquamen, mel. sale, oleo et coriandro.

Bulbos olei liquamine, aceto. inferes modico cimino disparso. Aliter: bulbos fundis, aequo ex aqua coques, deinde oleo frigis. ius sic facies: timum, puleium, piper, origanum, mel, acetum modicum et, si placet, modicum liquamen. piper aspargis et inferes.

Aliter: bulbos elixas in pultarium pressos, mittis timum, origanum, mel, acetum, defrictum, cariotum, liquamen et oleum modicum. piper aspargis et inferes.

[Varro siquidem de bulbis dixit ,,in aquam qui Veneris otium quaerunt", deinde ut legitimis nuptiis in cena ponuntur, sed et cum nucleis pineis aut cum erucae sucu et pipere.]

Aliter: bulbos frictos oenogaro inferes.

Fungi farnei: elixi, calidi exiccati oenogaro, pipere accipiuntur, ita ut piper cum liquamine teras.

In fungis farneis: piper, caroenum, acetum et oleum.

Aliter fungi farnei elixi ex sale, oleo, mero, coriandro conciso inferuntur.

Boletos: fundis. caroenum, fasciculum coriandri viridis. ubi fervuerit, exempto fasciculo inferes.

Boletos aliter: coliculos eorum liquamine vel sale asparsos inferunt.

Boletos aliter: tirsos eorum incisos in patellam. uvam perfundis addito pipere, ligistico, modico melle, liquamine temperabis. oleum modicum.

Tubera radis, elixas, sale aspargis, et surculo infigis, subassas et mittis in caccabum oleum, liquamen, caroenum, vinum, piper et mel. cum fervuerit, amolo obligas. tubera exoneras et inferes.

Aliter tubera: elixas et asparso sale in surculis affigis et subassas et mittis in caccabum liquamen, oleum, viride, caroenum, vinum modicum et piper confractum et mellis modicum et ferveat. cum fervuerit, amolo obligas et tubera conpungis ut conbibant illud. exoneras. cum bene sorbuerint inferes. si volueris, eadem tubera omento porcino involves et assabis et sic inferes.

Aliter tubera oenogaro: piper, ligisticum, coriandrum, rutam, liquamen, mel, vinum, oleum modice. calefacies.

Aliter tubera: piper, mentam, rutam, mel, oleum, vinum modicum. calefacies et inferes.

Aliter: tubera elixa cum porro, deinde sale, pipere, coriandro conciso, mero optimo. inferes.

Aliter tubera: piper, ciminum, sili, mentam, apium, rutam, mel, acetum vel vinum, salem vel liquamen et oleum modice.

In colocasio: piper, ciminum, rutam, mel, liquamen, olei modicum. cum fervuerit, amolo obligas.

Cocleas [lacte pastas]: accipies cocleas, spongizabis, membranam tolles ut possint prodire. adicies in vas lac et salem uno die, ceteris diebus lac per se et omni hora mundabis stercus. cum pasta fuerint, ut non possint se retrahere, ex oleo friges, mittes oenogarum. similiter ex pulpa sapa cibari possunt.

Cocleas sale puro et oleo assabis. Cocleas assas: lasare, liquamine, pipere, oleo. suffundis. Cocleas assas: liquamine, pipere, cimino, oleo. suffundis assidue.

Aliter cocleas: viventes in lac siligineum infundis. ubi pastae fuerint, coques.

Ova frixa oenogarato: ova elixa liquamine, oleo, mero vel ex liquamine, pipere, lasare. In ovis apalis: piper, ligisticum, nucleos infusos, suffundes mel, acetum, liquamine temperabis. Incipit Apici Caeli tetrapus.

Reader settings

Side Panel

Text SizeRelative to your text size
85%

Textual Aids

Touch Navigation