IV.
Sala cottabia: piper, mentam, apium, puleium aridum, casiam, nucleos pineos, mel, acetum, liquamen, ovorum vitella. quam recentem panem ex posca maceratum exprimes, caseum bubulum, cucumeres in caccabnlo conpones interpositis ungulis, mutes concisim copadiis porcinis uti iocusculis gallinarum. ius perfundes. super frigidam collocabis et sic appones.
Aliter sala cottabia apiciana: adicies in mortario api semen, puleium aridum, mentam aridam, gingiber, coriandrum viride, uvam passam enucleatam, mel, acetum, oleum et vinum, conteres. adicies in caccabulum panis picentini tria frustra, interpones pulpas pulli, glandulas aedinas, caseum vestinum, nucleos, pineos, cucumeres, cepas aridas minute concisas. ius supra perfundes. insuper nivem sub ora aspargis et inferes.
Aliter sala cottabia: panem alexandrinum excavabis, in posca macerabis. adicies in mortarium piper, mentam, alium, coriandrum viride, caseum bubulum sale conditum, aquam, oleum, insuper vinum et inferes.
Caccabinaminore: olera diverse elixa conpone et pullinam intersere, si volueris. condis liquamine et oleo et bulliat. teres piper modicum et folium et cum tritura conmisces ovum et tribulas. Alias tritura unde perfundes caccabina: teres ergo folium quantum conpetat cum cerefolio uno et quarta parte de lauri baca et medium caulis elixi et folia coriandri et solves de iuscello eius et vaporabis in cinere calido et adorna. antequam fundas in vasculo, perfundis conditam et sic ponis.
Caccabina fusile: malvas, porros, betas sive coliclos elixatos, turdos adque esiciatum pullum, copadia porcina sive pullina et cetera quae in praesenti habere poteris, conpones variatim. teres piper, ligisticum cum vini veteris pondo II. liquamen pondo I. mel pondo I. olei aliquantum. iustata [id. permixta et temperata] mittis in patinam et fac ut modice ferveat. et cum coquitur, adicies lactes, in uno ova dissoluta cum lacte perfundes. patinam mox constrinxerit, inferes.
Patina cottidiana: cerebella elixata teres cum pipere. ciminum, lasar cum liquamine, curoenum, lacte et ovis. ad ignem lenem vel ad aquam calidam coques.
Aliter patina versatilis: nucleos, nuces fractas, tores eas et teres cum melle, pipere, liquamine, lacte et ovis. olei modicum.
Aliter patina: tirsum lactucae teres, cum pipere, liquamine, caroeno, aqua oleo coques, ovis obligabis. piper aspargis et inferes.
Aliter patina fusilis: accipies holisatra, purgas, lavas, coques, refrigerabis, restringues. accipies cerebella IV. enervabis, coques. adicies in mortarium piperis scripulos VI. suffundes liquamen, fricabis, postea adicies cerebella, fricabis iterum, adicies holisatra et simul conteres, postea franges ova octo, adicias ciatum liquaminis, vini ciatum, passi ciatum, contrita simul temperabis. patinam perungues, inpones in termospodio. postea cum coctum fuerit, piper aspargis et inferes.
Patina de asparagis frigida: accipies asparagos purgatos, in mortario fricabis, aqua suffundes, perfricabis, per colum colabis. Et mittes ficetulas curtas. Teres in mortario piperis scripulos VI. adicies liquamen, fricabis, vini ciatum, [vini] passi ciatum, mittes in caccabulum olei unc. III. illic ferveat. Perungues patinam, in ea ova VI. cum oenogaro misces, cum suco asparagi si inpones cinere calido, mittes inpensam supra scriptam, tunc ficetulas conpones. coques. piper aspargis et inferes.
Aliter patina de asparagis: adicies in mortarium asparagorum praecisuras [quae prociduntur], teres, suffundes vinum, colasteres piper, ligisticum, coriandrum viride, satureiam, cepam, vinum, liquamen et oleum. sucum transferes in patellam perunctam et si volueris ova, dissolves ad ignem ut obliget. piper minutum asparges.
[Aliter] Patinam ex rusticis sive tamnis sive scnapi viridi sive cucumere sive coliclis ita facies. si volueris, substernes pulpas piscium vel pullorum.
Aliter patina de sabuco calida et frigida: accipies semen de sabuco, purgabis, ex aqua decoques, paulum exiccabis, in patina conpones ad surcellum. adicies piperis scripulos VI. suffundes liquamen, fricabis, postea adicies liquaminis ciatum unum, vini ciatum, passi ciatum, teres, tandem in patinam mittes et olei unc. IV. pones in termospodio et facies ut ferveat. cum fervuerit, franges postea ova VI. agitabis et patinam sic obligabis. cum obligaveris, piper aspargis et inferes.
Patinam de toris: accipies rosas et exfoliabis, album tolles, mittes in mortarium, suffundes liquaminis ciatum unum [semis] et sucum per colum colabis. accipies cerebella IV. enervabis et teres piperis scripulos VIII. suffundes ex suco, fricabis, postea ova VIII. franges, vini ciatum unum, passi ciatum unum et olei modicum. postea patinam perungues et eam inpones cinere calido et sic inpensam supra scriptam mittes. cum cocta fuerit in termospodio, piperis pulverem super adspargis et inferes.
Patinam de cucurbita: cucurbitas elixas et frictas in patina conpones, ciminatum superfundes, modico oleo super adiecto fervere facias et inferes.
Patina de apua: apuam lavas, ex oleo maceras, in cumana conpones, adicies oleum, liquamen, vinum, alligas fasciculos rutae et origani et subinde apuam baptizabis. cum cocta fuerit, proicies fasciculos et piper aspargis et inferes.
Patina de apua sine apua: pulpas piscis assi vel elixi minutatim facies ita abundanter ut patinam qualem voles inplere possit. teres piper et modicum rutae, suffundes liquamen quod satis erit et olei modicum et conmisces in patina cum pulpis, sic et ova cruda confracta, ut unum corpus fiat. desuper leniter conpones urticas marinas, ut non cum ovis misceantur. inpones ad vaporem, ut cum ovis ire possint et cum siccaverint super aspargis piper tritum et inferes. ad mensam nemo agnoscet quid manducet.
Patina ex lacte: nucleos infundes et siccas eos — recentes imbre paratos habebis — accipies patinam et in ea conpones singula infra scripta: mediana malvarum et betarum et porros maturos, apios, holus molle et viridia elixa, pullum carptum ex iure coctum, cerebella elixa, lucania, ova dura per medium incisa, mutes, longaones porcinos ex iure terentino farsos, coctos concisos, iscinera pullorum, pulpas piscis aselli fricti, urticas marinas, pulpas hostreorum. caseos recentes. alternis conpones nucleos et piper integrum asparges. ius tale perfundes: piper, ligisticum, api semen, silfi. coques. at ubi cocta fuerit, lactem colas, cui cruda ova conmisces, ut unum corpus fiat, et super illa omnia perfundes. cum cocta fuerit, echinos recentiores. piper aspargis et inferes.
Patinam apicianam sic facies: frustra suminis cocti, pulpas piscium, pulpas pulli, ficetulas vel pectora turdorum cocta et quaecunque optima fuerint. haec omnia concides diligenter praeter ficetulas, ova vero cruda, cum oleo dissolvis. teres piper, ligisticum, suffundes liquamen, vinum, passum et in caccabum mittis ut calefiat et amolo obligas. antea tamen pulpas concisas universas illuc mittes et sic bulliat at ubi coctum fuerit, levabis cum iure suo et in patellam alternis de trulla refunde sicium, piperis grana integra et nucleis pineis, ita ut per singula coria substernas diploidem, dein laganum similiter. quotquot lagana posueris, tot trullas inples, desuper adicies. unum vero laganum fistula percuties et super inpones. piper asparges. ante tamen illas pulpas ovis confractis obligabis et sic in saccabum mittes, tum inpensam. patellam [aeneam] qualem debes habere infra ostendatur.
Patina catillana: accipies frustra suminis cocta, pulpas piscium coctas, pulpas pulli coctas. haec omnia concides, [accipias patellam aeneam] ova confringes, in caccabum et dissolves. adicies in mortarium piper, ligisticum, fricabis, suffundes liquamen, vinum, passum, oleum modice, reexinanies in caccabum, facies ut ferveat, cum fervuerit et obligas. pulpas quas subcultrasti in ius mittis. substerne per diploides patinam aeneam et trullam plenam pulpae et disparges oleum et laganum pones similiter. quotquot lagana posueris tot trullas inpensae adicies. unum laganum fistula percuties, a superficie versas indusium, super focum pones. piper aspargis et inferes.
Patina versatilis vice dulci : nucleos pineos, nuces fractas et purgatas — at torre passas — teres cum melle, pipere, liquamine, lacte, ovis, modico mero et oleo.
Patellam tirotaricam: ex quocunque salso volueris, coques ex oleo, exossabis. et cerebella cocta, pulpas piscium, iocuscula pullorum, ova dura, caseum mollem excaldatum — haec omnia calefacies in patella. teres piper, ligisticum, origanum, rutae bacam, vinum, mulsum, oleum patellam ad lentum ignem, ut coquatur. ovis crudis obligabis, adornabis. ciminum mundum aspargis et inferes.
Patellam isiciam [isicia] de tursione: enervabis, concides minutatim. teres piper, ligisticum, origanum, petrosilinum, coriandrum, ciminum, rutae bacam, mentam siccam, ipsum tursionem. isicia deformabis. vinum, liquamen, oleum, coques. coctum in patellam collocabis. ius in ea facies : piper, ligisticum. satureiam, cepam, vinum, liquamen, oleum, in patellam, pones ut coquatur. ovis obligabis. piper asparges et inferes.
Patellam ex holisatro: elixas ex aqua nitrata, exprimis, in patellam. teres piper, ligisticum, coriandrum, satureiam, cepam, vinum liquamen, acetum, oleum. transferes in patellam, coques, amolo obligas. timum et piper minutum asparges. Et de quacunque herba, si volueris, facies ut supra.
Patina de apua fricta: apuam lavas, ova confringes et cum apua conmisces. adicies liquamen, vinum, oleum, facies ut ferveat et cum fervuerit, mittes apuam. cum duxerit, subtiliter versas. facies ut coloret. oenogarum simplex perfundes, piper aspargis et inferes.
Patina ex lagitis et cerebellis: friges ova dua, cerebella elixas et enervas, gigeria pullorum coquis. haec omnia divides praeter piscem, conpones in patina promisca, salsum coctum in medio pones. teres piper, ligisticum. sucum fundes ut dulce sit. piperatum mittis in patinam, facies ut ferveat. cum fervuerit, ramo rutae agitabis et amolo obligabis.
Patina mullorum: loco salsi mullos rades, in patina munde conpones, adice ius ut ferveat. cum fervuerit, mulsum mittes aut passum. piper aspargis et inferes.
Patina piscium: loco salsi pisces qualeslibet curatos friges, in patina conpones, adicies olei quod satis est et salsum interpones. facies ut ferveat. cum fervuerit, mittes mulsam et ius agitabis.
Patina piscium: pisces qualeslibet rades et duratos mittes. cepas siccas ascalonias vel alterius generis concides in patinam et pisces super conpones, adicies liquamen, oleum. cum coctum fuerit, salsum coctum in medio pones. addendum acetum. asparges et coronam bubulam.
Patellam lucretianam: cepas pallachanas purgas — viridia earum proicies — in patinam concides, liquaminis modicum, oleum et aquam. dum coquitur, salsum crudum in medio ponis. at ubi cum salso prope cocta fuerit, mellae cocleare asparges, aceti et defricti pusillum gustas, si fatuum exierit, liquamen adicies, si salsum, mellis modicum. et coronam bubulam aspargis et bulliat.
Patinam de lagitis: lagitas rades, lavas. ova confringes et cum lagitis conmisces, adicies liquamen, vinum, oleum facies ut ferveat. cum fervuerit, oenogarum simplex perfundes. piper aspargis et inferes.
Patina zemate garoeneo: crudos quoslibet pisces in patina conpones, adicies oleum, liquamen, vinum coctum, fasciculum porri, coriandri. dum coquitur, teres piper, ligisticum, origani fasciculum, de suo sibi fricabis, suffundes ius de suo sibi, ova cruda dissolves, temperas. exinanies in patinam. facies ut obligetur. cum tenuerit, piper aspargis et inferes.
Patina solearum: soleas battues et curatas conpones in patina, adicies oleum, liquamen, vinum. dum coquitur, teres piper, ligisticum, origanum, fricabis, suffundes ius, ova cruda et unum corpus facies. super soleas refundes, lento igni et coques. cum duxerit, piper aspargis et inferes.
Patina de piscibus: piperis unciam, garoeni eminam, conditi eminam, olei unc. II.
Patina de pisciculis: uvam passam, piper, ligisticum, origanum, cepam, vinum, liquamen, oleum, transferes in patellam cum cocta fuerit, adicies in ipsam pisciculos coctos, amolo obligas et inferes.
Patina de piscibus: denticem, auratam et mugilem accipies, curatos subassabis, postea eos in pulpam carpeas. deinde hostrea curabis; adicies in mortarium piperis scripulos VI. suffundes liquamen, fricabis, postea adicies liquaminis ciatum unum, vini ciatum unum. mittes in caccabum ut olei unc. III. et hostrea. oenogarum facies fervere. cum fervuerit, patinam perunguis et in pulpam suprascriptam mittes, exin [condituram de hostreis] facies ut ferveat. cum fervuerit, franges ova XI. infundes supra hostrea. cum strinxerit, piper aspargis et inferes.
Patina de pisce lupo: teres piper, ciminum, petrosilinum, rutam, cepam, mel, liquamen, passum, olei guttas.
Pisces scorpiones rapulatos: coquis in liquamine et oleo et cum in mediam venerint cocturam, tolles. rapas elixas, madidas et minutissime concisas manibus depressabis, ut umorem non habeant, et cum pisce obligas et bulliat cum oleo abunde. et cum bullierit, teres ciminum, lauri bacam dimidiam, addes propter colorem crocum. amolabis de oridia propter spissitudinem. superfundes et tunc inferes. addes modicum acetum.
Pisces frixos cuiuscunque generis sic facies: teres piper, coriandri semen, lasaris radicem, origanum, rutam, cariotam, suffundes acetum, oleum, liquamen, adicies defrictum. haec omnia temperabis et in caccabulum mittes et ferveat. cum calefeceris, eosdem pisces superfundes asparso pipere et inferes.
Item pisces frixos sic facies: teres piper, ligisticum, bacam lauri, coriandrum mellique, vino, passo vel caroeno temperas. coques igni lento, amolo oridiae obligas et inferes.
Pisces assos: teres piper, ligisticum, satureiam, cepam siccam, suffundes acetum, adicies cariotam, anetum, ovorum vitella, mel, acetum, liquamen, oleum, defrictum. haec omnia in unum mixta perfundes.
Pisces in eleogaro: friges pisces. teres piper, ligisticum, rutam, condimenta viridia, cepam siccam, adicies ex oleo liquamen et inferes.
Sardas sic facies: teres piper, ligistici semen, origanum, cepam siccam, ovorum coctorum vitella, acetum, oleum. haec in unum temperas et perfundes.
Item pisces in eleogaro: a crudo pisces quos volueris lavas, conponis in patina, mittis oleum, liquamen, vinum, fasciculos porri et coriandri. coquitur. teres piper, origanum, ligisticum et fasciculos quos elixasti teres et suffundes inpensam de patina. facis ut obliget. cum bene tenuerit, pipere asparso inferes.
Mullos anecatos sic facies: rades pisces, lavabis, in patina conpones, adicies oleum, liquamen, vinum, fasciculos porri et coriandri, mittes ut coquatur. adicies piper in mortarium, fricabis, adicies oleum et parte aceti, vino, passo temperabis. traicies in caccabum, ponis ut ferveat. amolo obligabis ef patinam piscium perfundis. insuper piper aspargis.
Aliter mullos: rades, lavas, conponis in patina, adicies oleum, liquamen, vinum, in coctura fasciculum porri et coriandri, inponis ut coquatur. teres piper, ligisticum, origanum, adicies de iure suo [hoc de patella], vino, passo temperas mittis in caccabum, ponis ut ferveat. amolo obligabis et patellam postea perfundes, piper aspargis et inferes.
Murenas aut anguillas vel mullos sic facies: purgabis, conpones in patina diligenter. adicies in mortarium piper, ligisticum, origanum, mentam, cepam aridam et fundes vini acetabulum, liquaminis dimidium, mellis tertiam partem, modice defrictum ad clucliare. debent autem hoc iure coperi, ut super cocturam supersit aliquid iuris.
Locustas et squillas: teres piper, ligisticum, api semen et fundes acetum, liquamen, ovorum vitella et mixta in unum perfundis et inferes.
Pisces elixos: teres piper, ligisticum, api semen, origanum, suffundes acetum, adicies nucleos pineos, cariotam quod satis sit, mel, acetum, liquamen, sinape. temperabis et uteris.
Patina solearum ex ovis: rades, purgas, conponis in patina, adicies liquamen, oleum, vinum, fasciculum porri et coriandri semen. mittis ut coquatur. teres piper modicum, origanum, suffundis ius de suo sibi, adicies vinum, decem cruda ova dissolves et in unum corpus facies. traicies in patinam super soleas. ad ignem lentum pones ut decoquat et cum duxerit, piper aspargis.
Patina de sorbis calida et frigida: accipies sorba, purgas, in mortario fricabis, per colum colabis. cerebella enervabis quattuor cocta, mittes in mortarium, piperis scripulos VIII. suffundes liquamen, fricabis. adicies sorba, in se contemperabis, franges ova VIII. adicies ciatum liquaminis unum. patinam mundam perungues et in termospodio pones et sic cam inpensam mittes ac subtus supra termospodium habeat. cum cocta fuerit, piper minutum aspargis et inferes.
Patina de persicis: persica duriora purgabis, frustratim concides, elixas, in patina conpones, olei modicum superstillabis et cum ciminato inferes.
Patina de piris: pira elixa et purgata e medio teres cum pipere, cimino, melle, passo, liquamine, oleo modico. ovis missis patinam facies. piper super aspargis et inferes.
Patina urticarum calida et frigida: urticam accipies, lavas, colas per colum, exiccabis, in tabula eam concides. teres piperis scripulos X. suffundes liquamen, fricabis. postea adicies liquaminis ciatos II. olei unc. VI. caccabus ferveat. cum fervuerit, coctum tolles ut refrigescat. postea patinam mundam perungues, franges ova octo et agitabis. perfundes. subtus supra cinerem calidum habeat. coctum, piper minutum aspargis et inferes.
Patina de cidoneis: mala cidonea cum porris, melle, liquamine, oleo defricato coques et inferes, vel elixata ex melle.
[Minutal de piscibus vel isiciis.] Minutal marinum: pisces in caccabum, adicies liquamen, oleum, vinum, coctura porros capitatos, coriandrum minutatim concides isiciola de piscibus minuta facies, et pulpas piscis cocti concapis, urticas marinas bene lotas. mittes. haec omnia cum cocta fuerint, teres piper, ligisticum, origanum, fricabis, liquamen suffundes, ius de suo sibi. exinanies in caccabum. cum fervuerit, tractam confringes, obligas. cum fervuerit, agitas. piper aspargis et inferes.
Minutal terentinum: concides in caccabum albamen de porris minutatim, adicies oleum, liquamen coctura isiciola valde minuta et sic temperas ut tenerum sit. — isicium terentinum facies, inter isiciam confectionem invenies —. ius tale facies: piper ligisticum, origanum, fricabis, suffundes liquamen, ius de suo sibi, vino et passo temperabis. mittes in caccabum. cum fervuerit. tractam confringes, obligas. piper aspargis et inferes.
Minutal apicianum: oleum, liquamen, vinum, porrum capitatum, mentam, pisciculos, isiciola minuta, testiculos caponum, glandulas porcellinas. haec omnia in se coquantur. teres piper, ligisticum, coriandrum viride vel semen, suffundes liquamen, adicies mellis modicum et ius de suo sibi, vino et mello temperabis. facies ut ferveat. cum fervuerit, tractam confringes, obligas. coagitas. piper aspargis et inferes.
Minutal matianum: adicies in caccabum oleum, liquamen, coctura concides porrum, coriandrum, isicia minuta, spatulam porcinam coctam tessellatim concides cum sua sibi tergilla. facies ut simul coquantur. media coctura mala matiana purgata intrinsecus, concisa tessellatim mittes. dum coquitur, teres piper, ciminum, coriandrum viride vel semen, mentam, lasaris radicem, suffundes acetum, mel, liquamen, defrictum modice et ius de suo sibi, acoeto modico temperabis. facies ut ferveat. cum fervuerit, tractam confringes et ex ea obligas. piper aspargis et inferes.
Minutal dulce ex citriis: adicies in caccabum oleum, liquamen, coctura porrum capitatum, concides coriandrum minutatim, spatulam porcinam coctam et isiciola minuta. dum coquitur, teres piper, ciminum, coriandrum viride vel semen, rutam viridem, lasaris radicem, suffundes acetum, defrictum, ius de suo sibi, acoeto temperabis et ferveat cum fervuerit, citrium purgatum intro foras, tessellatim concisum et elixatum in caccabum mittes. tractam confringes et ex ea obligas. piper aspargis et inferes.
Minutal ex praecoquiis: adicies in caccabum oleum, liquamen, vinum, concides cepam ascaloniam aridam, spatulam porcinam coctam tessellatim concides. his omnibus coctis teres piper, ciminum, mentam siccam, anetum, suffundis mel, liquamen, passum, acetum modice, ius de suo sibi, temperabis. praecoquia enucleata mittes. facies ut inferveat donec percoquantur. tractam confringes et ex ea obligas. piper aspargis et inferes.
Minutal ex iocineribus et pulmonibus leporis: invenies inter lepores quemadmodum facies. adicies in caccabum liquamen, vinum, oleum, coctura porrum et coriandrum concisum, isicia minuta, spatulam porcinam coctam tessellatim concisam et in eundem caccabum mittes. dum coquitur, teres piper, ligisticum, origanum, ius de suo sibi, vino et passo temperabis. facies ut ferveat. cum fervuerit, tractam confringes et ex ea obligas. piper aspargis et inferes.
Minutal ex rosis: eodem iure suprascripto, sed passum plus adicies.
[Tisanam vel sucum] Tisanam sic facies: tisanam lavando fricas quam ante diem infundis, inpones supra ignem calidum. cum bullierit, mittes olei satis et aneti modicum fasciculum, cepam siccam, satureiam et puleium, ut ibi coquantur. propter sucum mittes coriandrum viride et salem simul tritum et facies ut ferveat. cum bene fervuerit, tolles fasciculum. et transferes in alterum caccabum tisanam sic ne fungum tangat propter conbusturam. lias et collocas in caccabo super acronem colefium. teres piper, ligisticum, puleii aridi modicum, ciminum et silfi frictum — ut bene teratur, suffundis acetum — defrictum, liquamen. refundis in caccabum, sed colefium acronem. facies ut ferveat super ignem lentum.
Tisanam farricam: infundis cicer, lenticulam, pisam. defricas tisanam et cum leguminibus elixas. ubi bene bullierit, olei satis mittis et super viridia concidis porrum, coriandrum, anetum, feniculum, betam, malvam, coliculum mollem et viridia minutatim concisa in caccabum mittis. Coliclos elixas. et teres feniculi semen satis, origanum, silfi (piper), ligisticum. postquam triveris, liquamine temperabis et super legumina refundis et agitas, coliclorum minuta super concidis.
Gustum versatile: albas betas minutas, porros requietos, apios, bulbos, cocleas elixas. gigeria pullorum, aucellas, isicia coques ex iure. perunguis patinam et folia malvarum substernis et promixta olera conponis sicut laxa, permiscis bulbos inversos, damascena, cocleas, isicia, lucanicas breves concidis. liquamine, oleo, vino, aceto ponis ut ferveat. cum fervuerit, teres piper, ligisticum, gingiber, piretrum modicum, fricabis, suffundis et facies ut bulliat patina. ova conplura confringis et ius mortarii reliquum conmoves, conmiscis, patinam obligabis. Dum ducis, oenogarum ad eam sic fa- cies: teres piper, ligisticum, fricabis, suffundes liquamen et vinum, passo temperabis vel vino dulce, temperabis in caccabulo, mittis olei modicum. facies ut ferveat. cum fervuerit, amolo obligas. patinam versas in lancem, folia malvarum ante tollis, oenogaro perfundis, insuper piper aspargis et inferes.
Gustum de oleribus: condies bulbos liquamine, oleo et vino. cum cocti fuerint, iscinera porcelli et gallinarum et ungellas et scellas divisas — haec omnia cum bulbis ferveant. cum fervuerint, teres piper, ligisticum, suffundis liquamen, vinum et passum ut dulce sit, ius de suo sibi suffundis. revocas in bulbos. cum fervuerint, ad momentum amolo obligas.
Gustum de cucurbitis farsilibus: cucurbitas a latere subtiliter ad modum tessellae oblongae decidas et excavas et mittis in frigidam. inpensam ad eas sic facies: teres piper, ligisticum, origanum, suffundes liquamen, cerebella cocta, teres, ova cruda dissolves et misces, ut unum corpus efficias, liquamine temperabis. et cucurbitas suprascriptas non plene coctas ex ea inpensa inples, de tessella sua recludis. surclas. et coctas eximis et frigis. oenogarum sic facies: teres piper, ligisticum, suffundes vinum et liquamen, passo temperabis, olei modicum mittes in caccabum et facies ut ferveat. cum fervuerit, amolo obligas. et cucurbitas frictas oenogaro perfundis et piper aspargis et inferes.
Gustum de praecoquiis: pusilla praecoquia purgas, enucleas, in frigidam mittis, in patina conponis. teres piper, mentam siccam, suffundes liquamen, adicies mel, passum, vinum et acetum. refundis in patinam super praecoquia, olei modicum mittis et lento igni ferveat. cum fervuerit, amolo obligas. piper aspargis et inferes. Incipit Apici Caeli ospreos