X.
Ius diabotanon in pisce frixo: piscem quemlibet curas, salias, friges. friges. teres piper, ciminum, coriandri semen, lasaris radicem, origanum, rutam, fricabis, suffundes acetum, adicies cariotam, mel, defrictum, oleum, liquamen, temperabis. refundes in caccabum. facies ut ferveat cum fervuerit, piscem frictum perfundes, piper aspargis et inferes.
Ius in pisce elixo: piper, ligisticum, ciminum, cepullam, origanum, nucleos, cariotam, mel, acetum, liquamen, senape, oleum modice. ius callicum si velis, uvam passam.
Aliter in pisce elixo: teres piper, ligisticum, coriandrum viride, satureiam, cepam, ovorum vitella duo cocta, passum, acetum, oleum et liquamen.
Aliter ius in pisce elixo: piscem curabis diligenter. mittes in mortarium salem, coriandri semen, conteres, unde volves eum, adicies in patinam, coperies, gipsabis, coques in furno. cum coctus fuerit, tolles. aceto asperrimo aspargis et inferes.
Aliter ius in pisce elixo: cum curaveris piscem, adicies in sartaginem semen, aquam, anetum viride et ipsum piscem. cum coctus fuerit, aspargis aceto et inferes.
Ius alexandrinum in pisce asso: piper, cepam siccam, ligisticum, ciminum, origanum, api semen, pruna damascena enucleata, mustaceum, liquamen, defrictum, oleum et coques.
Aliter ius alexandrinum in pisce asso: piper, ligisticum, coriandrum viride, uvam passam enucleatam, vinum, [passum] liquamen, oleum et coques.
Aliter ius alexandrinum in pisce asso: piper, ligisticum, coriandrum viride, cepam, damascena enucleata, passum, liquamen, acetum, oleum et coques.
Ius in grongo asso: piper, ligisticum, ciminum frictum, origanum, cepam siccam, ovorum vitella cocta, vinum, mulsum, acetum, liquamen, defrictum et coques.
Ius in cornutam: piper, ligisticum, origanum, cepam, uvam passam enucleatam, vinum, mel, acetum, liquamen, oleum et coques.
Ius in mullos assos: piper, ligisticum, rutam, mel, nucleos, acetum, vinum, liquamen, oleum modice. calefacies et perfundes.
Aliter ius in mullos assos: rutam, mentam, coriandrum, feniculum omnia viridia, piper, ligisticum, mel, liquamen et oleum modice.
Ius in pelamide assa: piper, ligisticum, origanum, coriandrum viride, cepam, uvam passam enucleatam, acetum, liquamen, defrictum, oleum et coques. hoc ius convenit et in elixa. si vis, et mel addes.
Ius in percam: piper, ligisticum, ciminum frictum, cepam, pruna damascena enucleata, vinum, mulsum, acetum, oleum, defrictum et coques.
Ius in pisce rubellione: piper, ligisticum, careum, serpillum, api semen, cepam siccam, vinum, passum, acetum, liquamen, oleum. amolo obligas.
Ius in murena assa: piper, ligisticum, satureiam, crocomagna, cepam, pruna damascena enucleata, vinum, mulsum, acetum, liquamen, defrictum, oleum et coques.
Aliter ius in murena assa: piper, ligisticum, pruna damascena, vinum, mulsum, acetum, liquamen, defrictum, oleum et coques.
Aliter ius in murena assa: piper, ligisticum, nepetam montanam, coriandri semen, cepam, nucleos pineos, mel, acetum, liquamen, oleum et coques.
Aliter ius in murena assa: piper, ligisticum, anetum, api semen, rus siriacum, cariotam, mel, acetum, liquamen, oleum, senape, defrictum.
Aliter ius in murena elixa: piper, ligisticum, careum, api semen, coriandrum, mentam aridam, nucleos pineos, rutam, mel, acetum, vinum, liquamen, oleum modice. calefacies et amolo obligabis.
Aliter ius in murena elixa: piper, ligisticum, careum, ciminum, nucleos, cariotam, senape, mel, acetum, liquamen, oleum, defrictum.
Ius in pisce elixo: piper, ligisticum, petrosilinum, origanum, cepam aridam, mel, acetum, liquamen, vinum, oleum modice. cum bullierit, amolo obligas et in lance inferes.
Ius in lacertos elixos: piper, ligisticum, ciminum, rutam viridem, cepam, mel, acetum, liquamen oleum modice. cum bullierit, amolo obligas.
Ius in pisce asso: piper, ligisticum, timum, coriandrum viride, mel, acetum, liquamen, vinum, oleum, defrictum. calefacies et agitabis rutae surculo et obligabis amolo.
Ius in tinno: piper, ciminum, timum, coriandrum, cepam, uvam passam, acetum, mel, vinum, liquamen, oleum. calefacies et amolo obligas.
Ius in tinno elixo: piper, ligisticum timum, condimentum, hortariam, cepam, cariotam, mel, acetum, liquamen et oleum et senape.
Ius in dentice asso: piper, ligisticum, coriandrum, mentam, rutam aridam, malum cidonium, coctum mel, vinum, liquamen, oleum. calefacies et amolo obligabis.
Ius in dentice elixo: piper, anetum, ciminum, timum, mentam, rutam viridem, mel, acetum, liquamen, vinum, oleum modice. calefacies et amolo obligabis.
Ius in pisce aurata: piper, ligisticum, careum, origanum, rutae bacam, mentam, mirtae bacam, ovi vitellum, mel, acetum, oleum, vinum, liquamen. calefacies et sic uteris.
Ius in pisce aurata assa: piper, coriandrum, mentam aridam, api semen, cepam, uvam passam, mel, acetum, vinum, liquamen, oleum.
Ius in scorpione elixo: piper, careum, petrosilinum, cariotam, mel, acetum, liquamen, senape, oleum, defrictum.
In pisce oenogarum: teres piper, rutam, mel, conmisces passum, liquamen, caroenum et igni mollissimo calefacies. Aliter in pisce oenogarum: ut supra facies. cum bullierit, amolo obligabis.
Ius in anguillam: piper, ligisticum, api semen, anetum, rus siriacum, cariotam, mel, acetum, liquamen, oleum, senape et defrictum.
Ius in anguillam: piper, ligisticum, rus siriacum, mentam siccam, rutae bacas, ovorum vitella cocta, mulsum, acetum, liquamen, oleum. coques.