I.
Conditum paradoxum: [conditi paradoxi conpositio] mellis partes XV in aeneum vas mittuntur praemissis vini sextariis duobus, ut in coctura mellis vinum decoquas quod igni lento et aridis lignis calefactum conmotum ferula [dum coquitur] si effervere coeperit, vini rore conpescitur, praeter quod subtracto igni in se redit. cum perfrixerit, rursus accenditur, hoc secundo ac tertio fiet ac tum demum remotum a foco postridie despumatur. tunc piperis unc. IIII. contriti masticis scripulos III. foli et croci dragmas singulas dactilorum ossibus torridis quinque iis denique [dactilis] vino emollitis, intercedente prius suffusione vini de suo modo ac numero ut tritura levis habeatur. his omnibus paratis supermittis vini lenis sextarios XVIII. carbones perfecto aderunt duo milia.
Conditum melizomum [viatorum conditum melizomum] perpetuum quod subministratur per viam peregrinanti: piper tritum cum melle despumato in cupellam mittis conditi loco et ad momentum quantum sit bibendum tantum aut mellis porro feras aut vinum misceas. sed suaserim nonnihil vini melizomo mittas. [adiciendum propter mellis exitum solutiorem].
Absintium romanum sic facies condiri Camerini praeceptis utique pro absintio cessante, in cuius vicem absinti pontici purgati terebintique unciam thebaicam dabis, masticis, foli III. costi scripulos VI. croci scripulos III. vini cuiusmodi sextarios XVIII. carbones amaritudo non exigit.
Rosatum sic facies: folia rosarum albo sublato lino inseris — ut sutiles facias — et vino quam plurimas infundis, ut septem diebus in vino sint. post septem dies rosam de vino tollis et alias sutules recentes similiter mittis, ut per dies septem in vino requiescant et rosam eximis similiter. a tertio facias et rosam eximis et vinum colas et cum ad bibendum voles uti, addito melle rosatum confacies sane custodito ut rosam a rore siccam et optimam mittas. Similiter ut supra de viola violatum facies et eodem modo melle temperabis. Rosatum sine rosa sic facies: folia citri viridia in sportella palmea in dolium musti mittes antequam ferveat et post quadraginta dies exime. cum necesse fuerit, mel addes et pro rosato utere.
Oleum liburnicum sic facies: in oleo spano mittes elenium et ciperum et folia lauri non vetusta, tunsa omnia excribellata ad levissimum pulverem redacta et sales frictos tritos et per triduum vel plus porro misce diligenter, post haec aliquanto tempore patere requiescere et liburnicum omnes putabunt
Vinum ex atro candidum sic facies: lomentum ex faba factum vel ovorum trium alborem in lagonam mittis et diutissime agitas. si salem adieceris candidum et cinerem vitis albae, idem faciunt.
De liquamine emendando. liquamen si odorem malum fecerit, vas inane inversum fumiga lauro et cupresso et in hoc liquamen infunde ante ventilatum. si salsum fuerit, mellis sextarium mittis et move spicas et emendasti. sed et mustum recens idem praestat.
Ut carnes sine sale quovis tempore recentes sint: carnes recentes quales volueris melle tegantur, sed vas pendeat. et quando volueris, utere hoc hieme melius fit, aestate paucis diebus durabit et in carne cocta itidem facies.
Callum porcinum vel bubulum et ungellae et cocta ut diu durent: in senapi ex aceto, sale, melle facto mittis, ut tegantur et quando volueris, utere. miraberis
Ut carnem salsam dulcem facias: carnem salsam dulcem facies, si prius in lacte coquas et postea in aqua.
Ut pisces fricti diu durent: eodem momento quo friguntur et levantur ab aceto calido perfunduntur.
Hostrea ut diu durent: vasa bacato, ante ex aceto obbas, callo pisito lava et hostrea conpone.
Ut uncia lasaris toto tempore utaris: lasar in spatiosum doliolum vitreum mittis et nucleos [pineos ut puta] viginti cumque utendum fuerit lasare, nucleos conteres. exin, si vis, inrorabis in sapores et tantum numero nucleorum doliolo reserentur.
Ut dulcia melle diu durent: accipies quod Graeci dicunt πνηίον et facies farinam et admisces cum melle et tempore quo dulcia facturus es.
Ut mel malum bonum facias: mel malum bonum facies ad vendendum, unam partem mali et duas boni si simul miscueris.
Mel corruptum ut probes: elenium infundes in melle et iucendes, si incorruptum est, lucet.
Uvae ut diu serventur: accipies uvas de vite illaesas et aquam fluvialem ad tertias decoques et mittes in vas in quo et uvas mittis vaspicem et gipsari facies et in locum frigidum ubi sol accessum non habet poni facias et, quando volueris, uvas virides invenies. et ipsam aquam pro idromelli aegri dabis. et si in ordeo obruas, illaesas invenies.
Ut mala et mala granata diu durent: in aquam (marinam) calidam ferventem merge et statim leva et suspende.
Ut mala cidonia diu serventur: eligis mala sine vitio cum ramulis et foliis (ficulnis), condes in vas et suffundes mel et defrictum et diu servabis.
Ficum recentem, mala, pruna, pira, cerasia ut diu serves: omnia cum petiolis diligenter legito et in melle ponito, ne se contingant.
Citria ut diu durent: in vas citrium mitte, gipso suspende.
Ut diu durent mora: ex moris sucum facito et cum sapa misce in vitreo vaso, tum mora mitte custodies multo tempore.
Holera ut diu serventur : holera electa non satis matura in vaspicetum repone.
Rapae ut diu serventur: antea curatas et conpositas perdes mirtae bacis cum melle et aceto. Aliter: senapi tempera, melle, aceto, sale et super conpositas rapas infunde.
Tubera ut diu serventur: tubera quae aqua non vexaverint conponis in vas alternis, alternis scobemsiccam mittiset gipsas et loco frigido pones.
Duracina persica ut diu durent: eligito optima et mitte in muriam, postero die exime et spongizabis diligenter et collocabis in vas, fundes salem, acetum, satureiam.
Olivas virides servare ut quovis tempore oleum facias: olivas de arbore sublatas in illud mittis et erunt tales quovis tempore quasi mox de arbore redemptae. de quibus, si volueris, oleum viride facies.
Damascena, dactilos, uvas passas, granata, haec omnia in loco sicco pone, ne odorem et virtutem perdant.
Sales conditos ad multa: sales conditos ad digestionem, ad ventrem movendum et omnes morbos et pestilentiam et omnia frigora prohibere generari. sunt autem et suavissimi ultra quam speras. Sales communes frictos lib. I. sales ammonicos frictos lib. II. piperis albi unc. III. gingiberis unc. II. ammeos unc. I. semis, timi unc. I. semis, api seminis unc. I semis — sin api semen mittere nolueris, petrosilini mittis unc. III. — origani unc. III. erucae seminis unc. I. semis, piperis nigri unc. III. croci unc. I. isopi cretici unc. II. foli unc. II. petrosilini unc. II. aneti unc. II.
Ciminatum in hostrea et concilia: piper, ligisticum, petrosilinum, mentam siccam, folium, malabatrum, ciminum plusculum, mel, acetum et liquamen. Aliter: piper, ligisticum, petrosilinum, mentam siccam, ciminum plusculum, mel, acetum, liquamen.
Lasaratum: lasar cirenaicum vel particum tepida dissolvis, cum aceto liquamen temperatum. vel piper, petrosilinum, mentam siccam, lasaris radicem, mel, acetum, liquamen. Aliter: piper, careum, anetum, petrosilinum, mentam siccam, silfi, folium, malabatrum, spicam indicam, costum modicum, mel, acetum liquamen.
Oenogarum in tubera: piper, ligisticum, coriandrum, rutam, liquamen, mel et oleum modice. Aliter: timum, satureiam, piper, ligisticum, mel, liquamen et oleum.
Oxyporum: cimini unc. II. gingiberis unc. I. rutae viridis unc. I. nitri scripulos VI. dactilorum pinguium scripulos XII. piperis unc. I. mellis unc. IX. ciminum autem aethiopicum aut siriacum aut libicum aceto infundes, sicca et sic tundes. postea melle conprehendis, cum necesse fuerit, oxigaro. uteris.
Hypotrima: piper, ligisticum, mentam aridam, nucleos pineos, uvam passam, cariotam, caseum dulcem, mel, acetum, liquamen, vinum, oleum, defrictum aut cariotum.
Oxygarum digestibile: piperis semunciam, sili gallici scripulos III. cardamomi scripulos VI. cimini scripulos VI. foliscripulum I. mentae siccae scripulos VI. tunsa cribrataque melle colligis, cum opus fuerit, liquamen et acetum addis. Aliter: piperis unc. I. petrosilini, carei, ligistici unc. singulas. melle colliguntur, cum opus fuerit, liquamen et acetum addes.
Mortaria: mentam, rutam, coriandrum, feniculum omnia viridia, ligisticum piper, mel, liquamen. si opus fuerit, acetum addes. Incipit Apici Caeli sarcoptes.