V.
Pultes. Alicam purgatam infundis, coques. cum fervuerit, oleum mittis. cum spissaverit, lias. Adicies cerebella duo cocta et selibram pulpae quasi ad isicia friatae, cum cerebellis teres et in caccabum mittes. teres piper, ligisticum, feniculi semen, suffundis liquamen et meri modicum et mittis in caccabum supra cerebella et pulpam. ubi satis fuerit, cum iure misces. ex hoc paulatim alicam condies. sed ius ut quasi sucus videatur.
Pultes iulianae sic coquantur: alicam purgatam infundis, coques. facies ut ferveat. cum fervuerit, oleum mittis. cum spissaverit, lias. Adicies cerebella duo cocta et selibram pulpae quasi ad isicia friatae, cum cerebellis teres et in caccabum mittes. teres piper, ligisticum, feniculi semen, suffundis liquamen et vinum modice et mittis in caccabum supra cerebella et pulpam. ubi satis fuerit, cum iure misces. ex hoc paulatim alicam condies. sed ad trullam permisces et lias ut quasi sucus videatur.
Pultes iure oenogari cocti: pultes oenogari bene cocti iure condies [copadia]. similam sive alicam coctam hoc iure condies. et cum copadiis porcinis apponis oenogari cocti iure conditis.
Pultes tractogalatae: lactis sextarium et aquae modicum mittes in caccabum novum et lento igni ferveat. tres orbiculos tractae siccas et confringis et partibus in lac submittis. ne uratur, aquam miscendo agitabis. cum coctum fuerit, ut est, super inguen mittis.
Melle et musto si cum lacte similiter facies, salem et oleum minus mittis.
Lenticulam ex sfondilis sive fungulis: accipies caccabum mundum. adicies in mortarium piper, ciminum, semen coriandri, mentae, rutae, puleii, fricabis, suffundes acetum, adicies mel, liquamen et defrictum. aceto temperabis, reexinanies in caccabum, sfondilos elixatos teres et mittes ut ferveat, cum bene fervuerit, obligas. adicies in boletari oleum viride.
Lenticulam de castaneis: accipies caccabum novum et castaneas purgatas diligenter mittis, adicies aquam et nitrum modice. facies ut coquatur cum coquitur, mittes in mortarium piper, ciminum, semen coriandri, rutae, lasaris radicem, mentam, puleium, fricabis, suffundis acetum, mel, liquamen, aceto temperabis et super castaneas coctas refundis, adicies oleum. facies ut ferveat. cum bene fervuerit, turundabis. ut in mortario teres, gustas, si quid deest, addes. cum in boletare miseris, addes oleum viride.
Aliter lenticulam: coquis. cum despumaveris, porrum et coriandrum viride supermittis mittis coriandri semen, puleium, lasaris radicem, semen mentae et rutae, fricabis, suffundes acetum, adicies mel, liquamen. aceto, defricto temperabis, adicies oleum. agitabis. si quid opus fuerit, mittis. amolo obligas, insuper oleum viride mittis, piper aspargis et inferes.
Pisa. Pisam coques. enm despumaveris, porrum, coriandrum et ciminum supra mittis. teres piper, ligisticum [careum hoc est caravita], careum, anetum, ocimum viride, suffundes liquamen, vino et liquamine temperabis. facies ut ferveat. cum fervuerit, agitabis. si quid defuerit, mittes et inferes.
Pisam farsilem: coques, cui oleum mittis. Abdomen et mittis in caccabum, liquamen et porrum capitatum, coriandrum viride, inponis ut coquatur. isicia minuta facies quadrata et coques simul turdos vel aucellas vel de pullo concisa et cerebella prope cocta cum iuscello coques. Lucanicas assas. Petasonem elixas Porros ex aqua coquis. Nucleorum eminam frigis. Teres piper, ligisticum, origanum, gingiber, ius abdominis fundis, lias. Angularem accipies — conversari potest — et omentis tegis, oleum profundis, deinde nucleos aspargis et supra pisam mittis, ut tegas fundum angularis et sic conponis supra petasonis pulpas, porros, lucanicas concisas. iterum pisam supermittis. item alternis aptabis obsonia, quousque impleatur angularis. novissime pisam admittis, ut intus omnia contineat. Coques in furno vel lento igni inpones et ducat ad se deorsum. Ova dura facies, vitella eicies, in mortarium mittes cum pipere albo, nucleis, melle, vino candido et liquamine modico, teres et mittes in vas ut ferveat. cum fervuerit, pisam mittis in lancem et hoc iure perfundis. hoc ius candidum appellatur.
Pisam indicam: pisam coques. cum despumaveris, porrum et coriandrum concidis et mittis in caccabum ut ferveat. et accipies sepias minutas sic quomodo sunt cum atramento suo, ut simul coquantur, adicies oleum, liquamen et vinum, fasciculum porri et coriandri. facies ut coquatur. cum coctum fuerit, teres piper, ligisticum, origanum, carei modicum, suffundes ius de suo sibi, vino et passo temperabis. sepias minutatim concidis et in pisam mittis. piper asparges.
Pisam coques ac liabis et mittes in frigidam. cum refrigeraverit, deinde agitabis: concides cepam minutatim et albamentum ovi, oleo et sale condies, aceti modicum. adicies in boletari vitellum ovi cocti, coloras, insuper oleum viride mittis et inferes.
Pisam vitellianam sive fabam: pisam coques, lias. teres piper, ligisticum, gingiber et super condimenta mittis vitella ovorum quae dura coxeris. mellis unc. III. teres, liquamen, vinum et acetum. haec omnia mittis in caccabum et condimentum quae trivisti adiecto oleo ponis ut ferveat. condies pisam. libas, si aspera fuerit, melle mitis et inferes.
Aliter pisam sive fabam: ubi despumaveris, teres mel, liquamen, caroenum, ciminum, rutam, api semen. oleum et vinum. turundabis. cum pipere trito et cum isiciis inferes.
Aliter pisam sibi fabam: despumatam subtrito lasare partico, liquamine et caroeno condies. oleum modice superfundis et inferes.
Pisam adulteram versatilem: coques pisam. cerebella vel aucellas vel turtos exossatos a pectore, lucanicas, iscinera, gigeria pullorum in caccabum mittis, liquamen, oleum. fasciculum porri capitati, coriandrum viride concides et cum cerebellis coques. teres piper, ligisticum et liquamen.
Pisam sive fabam vitellianam: pisam sive fabam coques. cum despumaveris, mittes porrum, coriandrum, coliclos malvarum. dum coquitur, teres piper, ligisticum, origanum, feniculi semen, suffundis liquamen et vinum. in caccabum, adicies oleum. cum fervuerit, agitas. oleum viride insuper mittis et inferes.
Conciclam cum faba: coques. teres piper, ligisticum, ciminum, coriandrum viride suffundis liquamen, vino et liquamine temperabis. mittis in caccabum, adicies oleum. lento igni ferveat et inferes.
Conciclam apicianam: accipies cumanam mundam ubi coques pisam, cui mittis lucanicas concisas, isiciola porcina. pulpas petasonis. teres piper, ligisticum, origanum, anetum, cepam siccam, coriandrum viride, suffundis liquamen, vinum et liquamine temperabis mittis in cumanam, cui adicies oleum, pungis ubique ut conbibat oleum. igni lento coques ita ut ferveat et inferes.
Conciclam depisam: simplici pisam coques. cum despumaveris, fasciculum porri et coriandri mittis dum coquitur, teres piper, ligisticum, origanum, feniculum, de suo sibi fricabis, suffundis liquamen et temperabis. mittis in caccabum, super adicies oleum et lento igni ferveat et inferes.
Concicla commodiana: pisam coques. cum despumaveris, teres piper, ligisticum, anetum, cepam siccam, suffundis liquamen, vinum et liquamine temperabis. mittis in caccabum, ut combibat, deinde ova quattuor solves in sextarium, pisae mittis, agitas. mittis in cumanam, ad ignem ponis ut ducat et inferes.
Aliter conciclam sic facies: concides pullum minutatim, liquamine, oleo et vino ferveat, concides cepam, coriandrum minutum, cerebella enervata mittes in eundem pullum. cum coctus fuerit, levas, exossas [concides minutatim cepam et coriandrum], colas ibi pisam coctam, non conditam — accipies angularem — pro modo conpones varie. deinde teres piper, ciminum, suffundis ius de suo sibi, item in mortario ova duo dissolvis, temperas. [ius de suo sibi] suffundis pisae integre elixae, vel nucleis adornabis, et lento igni fervere facies et inferes.
Aliter concicla inculcatus pullus vel porcellus: exossabis pullum, a pectore et femora eius iungis in porrectum, surculo alligas et inpensam paras. et farcies alternis pisam, cocta cerebella, lucanicas et cetera. teres piper, ligisticum, origanum et gingiber, liquamen suffundes, vino et passo temperabis. facies ut ferveat et cum fervuerit, mittis modice. et inpensam condieris, si alternis in pullo conponis. omento tegis et in operculo deponis et in furnum mittis, ut coquatur paulatim et inferes.
Alicam vel sucum tisanae sic facies: tisanam vel alicam lavando fricas quam ante diem infundis, inponis supra ignem caldum. cum bullierit, mittes olei satis et aneti modicum fasciculum, cepam siccam, satureiam et puleium, ut ibi coquantur. propter sucum mittis coriandrum viride et salem simul tritum et facies ut ferveat. cum bene fervuerit, tolles fasciculum et transferes in alterum caccabum tisanam sic ne fundum tangat propter conbusturam. lias et collocas in caccabo super acronem colefium. teres piper, ligisticum, puleii aridi modicum, ciminum, silfi frictum — ut bene teratur suffundis mel — acetum, defrictum, liquamen. refundis in caccabum, sed colefium acronem. facies ut ferveat super ignem lentum.
Aliter tisanam: infundis cicer, lenticulam, pisam. defricas tisanam et cum leguminibus elixas. ubi bene bullierit, olei satis mittis et super viridia concidis porrum, coriandrum, anetum, feniculum, (betam, malvam) coliculum mollem. haec viridia minutatim concisa in caccabum mittis. Coliclos elixas. et teres feniculi semen satis, origanum, silfi, piper, ligisticum. postquam triveris, liquamine temperas et super legumina refundis, agitas. coliclorum minuta super concidis.
Fabaciae virides ex liquamine, oleo, coriandro viridi, cimino et porro conciso coctae inferuntur. Aliter: fabaciae frictae ex liquamine inferuntur. Aliter: fabaciae ex senapi trito, melle, nucleis, ruta, cimino. ex aceto inferuntur. Baianas elixas minutatim concidis. ruta, apio viridi, porro, aceto, oleo, liquamine, caroeno vel passo modico inferes.
Faenum graecum ex liquamine, oleo et vino. Faseoli virides et cicer ex sale, cimino, oleo et mero modico inferuntur. Aliter faseolos sive cicer: frictos ex oenogaro et pipere gustabis. Et elixati sumpto semine cum lobis in patella feniculo viride, pipere, liquamine — et earoeno modico pro salso — inferuntur. vel simpliciter et solet. Ineipit Apici Caeli tropetes. Lib VI.