Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Poem 0§ 0 Poem 1§ 1 Poem 2§ 2 Poem 3§ 3 Poem 4§ 4 Poem 5§ 5 Poem 6§ 6
Persius · Satires

Poem 2

Text kindly provided by Hypotactic

Hunc, Mācrīne, diem numerā meliōre lapillō,
quī tibi lābentīs appōnet candidus annōs.
funde merum geniō. nōn tū prece poscis emācī
quae nisi sēductīs nequeās committere dīvīs;
at bona pars procerum tacitā lībābit acerrā.
haut cuivīs prōmptum est murmurque humilīsque susurrōs
tollere dē templīs et apertō vīvere vōtō.
‘mēns bona, fāma, fidēs', haec clārē et ut audiat hospes;
illa sibi intrōrsum et sub linguā murmurat: ‘ō sī
ēbullet patruus, praeclārum fūnus!' et ‘ō sī
sub rāstrō crepet argentī mihi sēria dextrō
Hercule! pūpillumve utinam, quem proximus hērēs
inpellō, expungam; nam et est scabiōsus et ācrī
bīle tumet. Neriō jam tertia conditur uxor.'
haec sānctē ut poscās, Tiberīnō in gurgite mergis
māne caput bis terque et noctem flūmine pūrgās.
heus age, respondē (minimum est quod scīre labōrō)
dē Jove quid sentīs? estne ut praepōnere cūrēs
hunc cuinam? cuinam? vīs Stājō? an scīlicet haerēs?
quis potior jūdex puerīsve quis aptior orbis?
hoc igitur quō tū Jovis aurem inpellere temptās
dīc agedum Stājō. ‘prō Juppiter, ō bone' clāmet
‘Juppiter!' at sēsē nōn clāmet Juppiter ipse?
ignōvisse putās quia, cum tonat, ōcius īlex
sulpure discutitur sacrō quam tūque domusque?
an quia nōn fibrīs ovium Ergennāque jubente
trīste jacēs lūcīs ēvītandumque bidental,
idcircō stolidam praebet tibi vellere barbam
Juppiter? aut quidnam est quā tū mercēde deōrum
ēmeris auriculās? pulmōne et lactibus ūnctīs?
ecce avia aut metuēns dīvum mātertera cūnīs
exēmit puerum frontemque atque ūda labella
īnfāmī digitō et lūstrālibus ante salīvīs
expiat, ūrentīs oculōs inhibēre perīta;
tunc manibus quatit et spem macram supplice vōtō
nunc Licinī in campōs, nunc Crassī mittit in aedīs:
‘hunc optet generum rēx et rēgīna, puellae
hunc rapiant; quidquid calcāverit hic, rosa fīat.'
ast ego nūtrīcī nōn mandō vōta. negātō,
Juppiter, haec illī, quamvīs tē albāta rogārit.
poscis opem nervīs corpusque fidēle senectae.
esto age. sed grandēs patinae tuccētaque crassa
adnuere hīs superōs vetuēre Jovemque morantur.
rem struere exoptās caesō bove Mercuriumque
arcessīs fibrā: ‘dā fortūnāre Penātīs,
dā pecus et gregibus fētum.' quō, pessime, pactō,
tot tibi cum in flammā jūnīcum ōmenta liquēscant?
et tamen hic extīs et opīmō vincere fertō
intendit: ‘jam crēscit ager, jam crēscit ovīle,
jam dabitur, jam jam'; dōnec dēceptus et exspēs
nēquīquam fundō suspīret nummus in īmō.
sī tibi crēterrās argentī incūsaque pinguī
aurō dōna feram, sūdēs et pectore laevō
excutiat guttās laetārī praetrepidum cor.
hinc illud subiit, aurō sacrās quod ovātō
perdūcis faciēs. ‘nam frātrēs inter aēnōs,
somnia pītuītā quī pūrgātissima mittunt,
praecipuī suntō sitque illīs aurea barba.'
aurum vāsa Numae Sāturniaque inpulit aera
Vestālīsque urnās et Tuscum fictile mūtat.
ō curvae in terrīs animae et caelestium inānēs,
quid juvat hoc, templīs nostrōs inmittere mōrēs
et bona dīs ex hāc scelerātā dūcere pulpā?
haec sibi corruptō casiam dissolvit olīvō,
haec Calabrum coxit vitiātō mūrice vellus,
haec bācam conchae rāsisse et stringere vēnās
ferventis massae crūdō dē pulvere jussit.
peccat et haec, peccat, vitiō tamen ūtitur. at vōs
dīcite, pontificēs, in sānctō quid facit aurum?
nempe hoc quod Venerī dōnātae ā virgine pūpae.
quīn damus id superīs, dē magnā quod dare lance
nōn possit magnī Messālae lippa propāgō?
conpositum jūs fāsque animō sānctōsque recessūs
mentis et incoctum generōsō pectus honestō.
haec cedo ut admoveam templīs et farre litābō.

Reader settings

Side Panel

Text SizeRelative to your text size
85%

Textual Aids

Touch Navigation