FABULAE INTERLOCUTORES.
AESCHINUS, adolescens.
CANTHARA, nutrix Pamphilae.
CTESIPHO, adolescens, frater Aeschini.
DROMO, servus Micionis.
DEMEA, senex, frater Micionis, pater Aeschini et Ctesiphonis.
GETA, servus Sostratae.
HEGIO, senex, propinquus Pamphilae.
MICIO, senex, frater Demeae, pater adoptivus Aeschini.
PAMPHILA, filia Sostratae, amica Aeschini.
SANNIO,leno.
SOSTRATA, mater Pamphilae.
SYRUS, servus Aeschini.
ADELPHI. ACTA LUDIS FUNEBRIBUS AEMILII PAULLI QUOS FECERE Q. FABIUS MAXIMUS, P. CORNELIUS AFRICANUS. EGERE L. ATTILIUS PRAENESTINUS, MINUTIUS PROTHIMUS. MODOS FECIT FLACCUS CLAUDII, TIBIIS SARRANIS. FACTA GRAECA MENANDRU L. ANICIO M. CORNELIO COSS.
PROLOGUS
POSTQUAM Poëta sensit scripturam suam
Ab iniquis observari, et adversarios
Rapere in peiorem partem quam acturi sumus,
Indicio de se ipse erit; vos eritis iudices
Laudine an vitio duci id factum oporteat.
Synapothnescontes Diphili comoedia est.
Eam Commorientes Plautus fecit fabulam.
In Graeca adolescens est qui lenoni eripuit
Meretricem in prima fabula. Eum Plautus locum
Reliquit integrum: eum hic locum sumpsit sibi
In Adelphos; verbum de verbo expressum extulit.
Eam nos acturi sumus novam: pernoscite
Furtumne factum existimetis, an locum
Reprehensum qui praeteritus negligentia est.
Nam quod isti dicunt malevoli, homines nobiles
Eum adiutare, assidueque una scribere;
Quod illi maledictum vehemens esse existimant
Eam laudem hic ducit maximam, quum illis placet
Qui vobis universis et populo placent;
Quorum opera in bello, in otio, in negotio,
Suo quisque tempore usus est sine superbia.
Dehinc ne exspectetis argumentum fabulae:
Senes qui primi venient ii partem aperient;
In agendo partem ostendent. Facite, aequanimitas
Poëtae ad scribendum augeat industriam.