Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
T. Maccius Plautus · Casina

Act 2, Scene 8

Text kindly provided by Perseus

Olympio
Sine modo rus veniat: ego remittam ad te virum
cum furca in urbem tamquam carbonarium.
Lysidamvs
Ita fieri oportet.
Olympio
Factum et curatum dabo.
Lysidamvs
Volui Chalinum, si domi esset, mittere
tecum obsonatum, ut etiam in maerore insuper
inimico nostro miseriam hanc adiungerem.
Chalinvs
Recessim cedam ad parietem, imitabor nepam;
captandust horum clanculum sermo mihi.
nam illorum me alter cruciat, alter macerat.
at candidatus cedit hic mastigia,
stimulorum loculi. protollo mortem mihi;
certum est, hunc Acheruntem praemittam prius.
Olympio
Vt tibi ego inventus sum obsequens. quod maxime
cupiebas, eius copiam feci tibi.
erit hodie tecum quod amas clam uxorem.
Lysidamvs
ita me di bene ament, ut ego vix reprimo labra
ob istánc rem quin te deosculer, voluptas mea.
Chalinvs
Quid, deosculere? quae res? quae voluptas tua?
ecfodere hercle hic volt, credo, vesicam vilico.†
Olympio
Ecquid amas nunc me?
Lysidamvs
Immo edepol me quam te minus.
licetne amplecti te?
Chalinvs
Quid, amplecti?
Olympio
Licet.
Lysidamvs
Vt, quia te tango, mel mihi videor lingere.
Olympio
Vltro te, amator, apage te a dorso meo.
Chalinvs
Illuc est, illuc, quod hic hunc fecit vilicum:
eidem me pridem, cum ei advorsum veneram,
facere atriensem voluerat sub ianua.
Olympio
Vt tibi morigerus hodie, ut voluptati fui.
Lysidamvs
Vt tibi, dum vivam, bene velim plus quam mihi.
Chalinvs
Hodie hercle, opinor, hi conturbabunt pedes:
solet hic barbatos sane sectari senex.
Lysidamvs
Vt ego hodie Casinam deosculabor, ut mihi
bona multa faciam clam meam uxorem.
Chalinvs
Attatae,
nunc pol ego demum in rectam redii semitam.
hic ipsus Casinam deperit. habeo viros.
Lysidamvs
Iam hercle amplexari, iam osculari gestio.
Olympio
Sine prius deduci. quid, malum, properas?
Lysidamvs
Olympio
At non opinor fieri hoc posse hodie.
Lysidamvs
Potest,
siquidém cras censes te posse emitti manu.
Chalinvs
Enim véro huc aures magis sunt adhibendae mihi:
iam ego uno in saltu lepide apros capiam duos.
Lysidamvs
Apud hunc sodalem meum atque vicinum mihi
locus est paratus: ei ego amorem omnem meum
concredui; is mihi se locum dixit dare.
Olympio
Quid eius uxor? ubi erit?
Lysidamvs
Lepide repperi.
mea uxór vocabit huc eam ad se in nuptias,
ut hic sit secum, se adiuvet, secum cubet;
ego iussi, et dixit se facturam uxor mea.
illa hic cubabit, vir aberit faxo domo;
tu rus uxorem duces: id rus hic erit
tantisper dum égo cum Casina faciam nuptias.
hinc tu ante lucem rus cras duces postea.
satin docte?
Olympio
Astute.
Chalinvs
Age modo, fabricamini,
malo hercle vestro tam vorsuti vivitis.
Lysidamvs
Scin quid nunc facias?
Olympio
Loquere.
Lysidamvs
Tene marsuppium,
abi atque obsona, propera, sed lepide volo,
molliculas escas, út ipsa mollicula est.
Olympio
Licet.
Lysidamvs
Emito sepiolas, lepadas, lolligunculas,
hordeías.
Chalinvs
Immo triticeías, si sapis.
Lysidamvs
Soleas.
Chalinvs
Qui quaeso potius quam sculponeas,
quibus báttuatur tíbi os, senex nequissime?
Olympio
Vin lingulacas?
Lysidamvs
Quid opust, quando uxor domi est?
ea lingulaca est nobis, nam numquam tacet.
Olympio
In re praesenti ex copia piscaria
consulere quid emam potero.
Lysidamvs
Aéquom oras, abi.
argento parci nolo, obsonato ampliter.
nam mihi vicino hoc etiam convento est opus,
ut quod mandavi curet.
Olympio
Iamne abeo?
Lysidamvs
Volo.—
Chalinvs
Tribus nón conduci possum libertatibus,
quin ego illis hodie comparem magnum malum
quinque hanc omnem rem meae erae iam faciam palam.
manifesto teneo in noxia inimicos meos.
sed si nunc facere volt era officium suom,
nostra omnis lis est. pulchre praevortar viros.
nostro omine it dies; iam victi vicimus.
ibo intro, ut id quod alius condivit cocus,
ego nunc vicissim ut alio pacto condiam,
quo id quoi paratum est ut paratum ne siet
sitque ei paratum quod paratum non erat.—

Reader settings

Side Panel

Text SizeRelative to your text size
85%

Textual Aids

Touch Navigation