Plesidippvs
Meamne ílle amicam leno vi, violentia
de ara deripere Veneris voluit?
Trachalio
Admodum.
Plesidippvs
Quin occidisti extemplo?
Trachalio
Gladius non erat.
Plesidippvs
Caperes aut fustem aut lapidem.
Trachalio
Quid? ego quasi canem
hominem insectarer lapidibus nequissimum?
Labrax
Nunc pol ego perii, Plesidippus eccum adest.
converret iam hic me totum cum pulvisculo.
Plesidippvs
Etiamne in ara tunc sedebant mulieres,
quom ad me profectu's ire?
Trachalio
Ibidem nunc sedent.
Plesidippvs
Quis illás nunc illic servat?
Trachalio
Nescio quis senex,
vicinus Veneris; is dedit operam optumam.
is nunc cum servis servat. ego mandaveram.
Plesidippvs
Duc me ad lenonem recta. ubi illic est homo?
Labrax
Salve.
Plesidippvs
Salutem nil moror. opta ocius:
rapi te obtorto collo mavis an trahi?
utrum vis opta, dum licet.
Labrax
Neutrum volo.
Plesidippvs
Abi sáne ad litus curriculo, Trachalio,
iube illós in urbem ire obviam ad portum mihi,
quos mecum duxi, hunc qui ad carnificem traderent.
post huc redito atque agitato hic custodiam.
ego hunc scelestum ín ius rapiam éxulem.
age, ambula in ius.
Labrax
Quid ego deliqui?
Plesidippvs
Rogas,
quin arrabonem a me accepisti ob mulierem
et eam hinc abduxti?
Labrax
Non avexi.
Plesidippvs
Cur negas?
Labrax
Quia pol provexi: avehere non quivi miser.
equidem tibi me dixeram praesto fore
apud Véneris fanum: numquid muto? sumne ibi?
Plesidippvs
In iure causam dicito, hic verbum sat est:
sequere.
Labrax
Obsecro te, subveni mi, Charmides.
rapior optorto collo.
Charmides
Quis me nominat?
Labrax
Viden me ut rapior?
Charmides
Video, atque inspecto lubens.
Labrax
Non subvenire mi audes?
Charmides
Quis homo te rapit?
Labrax
Adulescens Plesidippus.
Charmides
Vt nanctu's, habe.
bono animo meliust te in nervom conrepere.
tibi optigit quod plurimi exoptant sibi.
Labrax
Quid id est?
Charmides
Vt id quod quaerant inveniant sibi.
Labrax
Sequere, obsecro, me.
Charmides
Pariter suades qualis es:
tu in nervom rapere, eo me óbsecras ut te sequar.
etiam retentas?
Labrax
Perii.
Plesidippvs
Verum sit velim.
tu, mea Palaestra et Ampelisca, ibidem ilico
manete, dúm ego huc redeo.
Lorarius
Equidem suadeo,
ut ad nos abeant potius, dum recipis.
Plesidippvs
Placet,
bene facitis.
Labrax
Fures mi estis.
Lorarius
Quid, fures? rape.
Labrax
Oro obsecro, Palaestra.
Plesidippvs
Sequere, carnufex.
Labrax
Hospes—
Charmides
Non sum hospes, repudio hospitium tuom.
Labrax
Sicine me spernis?
Charmides
Sic ago: semel bibo.
Labrax
Di te infelicent.—
Charmides
Isti capiti dicito.
credo alium in aliam beluam hominem vortier:
illic ín columbum, credo, leno vortitur,
nam in collumbari collus haud multo post erit;
in nervom ille hodie nidamenta congeret.
verum tamen ibo, ei advocatus ut siem,
si qui mea opera citius addici potest.—