Appearance

Theme

Reading text

Font
Size
100%
Spacing
Contrast
normal

Gallia est omnis dīvīsa in partēs trēs, quārum ūnam incolunt Belgae.

Issues / Feedback

This report will be visible to the general public on our GitHub issue tracker. Please do not submit private or sensitive information.
Only needed if you want updates or clarification on GitHub.
Lines 1–26§ 1
Appendix Vergiliana · De Institutione Viri Boni

Lines 1–26

Text kindly provided by Perseus

De Institutione Viri Boni

vir bonus et sapiens, qualem uix repperit unum

milibus e cunctis hominum consultus Apollo,

iudex ipse sui totum se explorat ad unguem,

quid proceres, uanique leuis quid opinio uulgi,

securus, mundi instar habens, teres atque rotundus,

externae ne quid labis per leuia sidat.

ille diem quam longus erit sub sidere Cancri,

quantaque nox tropico se porrigit in Capricorno,

cogitat et iusto trutinae se examine pendit,

ne quid hiet, ne quid protuberet, angulus aequis

partibus ut coeat, nil ut deliret amussis,

sit solidum quodcumque subest nec inania subtus

[indicet admotus digitis pellentibus ictus],

non prius in dulcem declinans lumina somnum

omnia quam longi reputauerit acta diei.

quo praetergressus, quid gestum in tempore, quid non.

cur isti facto decus afuit aut ratio illi?

quid mihi praeteritum, cur haec sententia sedit

quam melius mutare fuit? miseratus egentem

cur aliquem fracta persensi mente dolorem?

quid uolui quod nolle bonum foret? utile honesto

cur malus antetuli? num dicto aut denique uultu

perstrictus quisquam? cur me natura magis quam

disciplina trahit? sic dicta et facta per omnia

ingrediensque ortoque a uespere cuncta reuoluens

offensus prauis dat palmam et praemia rectis.

Reader settings

Side Panel

Text SizeRelative to your text size
85%

Textual Aids

Touch Navigation